吾於詩人無所甚好，獨好淵明之詩。淵明作詩不多，然其詩質而實綺，癯而實腴，自曹、劉、鮑、謝、李、杜諸人，皆莫及也。
——東坡
東坡愛陶淵明，真係人人都知——東坡
話說東坡係黃州果陣，就係黃州東坡耕田
陶淵明有首遊斜川嘅詩
東坡有日突然覺得，呢邊嘅景色好似都一樣咁靚
所以就作左首詞，抒發自己嘅感情
我地不妨先讀陶淵明嘅遊斜川詩
陶淵明 遊斜川
序文：
辛酉正月五日，天氣澄和，風物閒美，與二三鄰曲，同遊斜川。臨長流，望曾城；魴鯉躍鱗於將夕，水鷗乘和以翻飛。彼南阜者，名實舊矣，不復乃為嗟嘆；若夫曾城，傍無依接，獨秀中皋；遙想靈山，有愛嘉名。欣對不足，率爾賦詩。悲日月之遂往，悼吾年之不留；年疏年紀鄉里，以記其時日。
中國新年一向都好重要
有萬象更新嘅意義
陶淵明選呢日同朋友去玩
「魴鯉躍鱗於將夕，水鷗乘和以翻飛」
良辰美景，自然寫得好動人
魚跳，夕照，水鷗翻飛
另一方面都深感又過一年，又近死亡一步
「悲日月之遂往，悼吾年之不留」
因而寫下呢首詩
開歲倏五日，吾生行歸休。
念之動中懷，及辰為茲游。
新嘅一年，話咁快就過左五日
我嘅餘生應該要歸於田園
諗到呢到，忽然心血來潮
要把握時間出去玩吓先！
氣和天惟澄，班坐依遠流。
弱湍馳文魴，閒谷矯鳴鷗。
文魴：銀灰色嘅小魚
陶淵明出去玩，天公造美
周圍嘅景色靚到不得了
弱湍、閒谷，對照之外
更係有視覺、聽覺嘅多重動態
依往遠方嘅河流坐低欣賞
睇吓小魚係微弱嘅水流游水
聽吓山谷嘅雀鳥鳴叫
一切都係令人好安心喜悅
迥澤散游目，緬然睇曾丘。
雖微九重秀，顧瞻無匹儔。
迥澤：廣闊嘅湖水
游目：隨意咁睇
曾丘：曾城
詩人既橫向咁睇廣闊嘅湖水
亦都縱向咁睇位於高山嘅曾城
一縱一橫，交織秀美嘅景色
雖然曾城無傳說中咁靚
但已經係四周入面嘅絕景，無可匹儔
提壼接賓侶，引滿更獻酬。
未知從今去，當復如此不？
陶淵明不斷咁向其他人敬酒
仲同朋友講：
唔知今次之後
我地有冇機會再咁樣歡聚架啦？
黎，隊返杯先啦！
中觴縱遙情，忘彼千載憂。
且極今朝樂，明日非所求。
盡情飲酒，飲到所有不快都溜走
我地講過，陶淵明係現世主義者
一生只有一次，來生並不可信
咁就緊係有得開心就開心啦
難得身心俱樂，緊係要享受先
未來係點，又有邊個掌握到呢？
東坡 江城子
夢中了了醉中醒，只淵明，是前生。走遍人間，依舊卻躬耕。昨夜東坡春雨足，烏鵲喜，報新晴。
雪堂西畔暗泉鳴，北山傾，小溪橫。南望亭丘，孤秀聳曾城。都是斜川當日景，吾老矣，寄餘齡。
上半片係講東坡對陶淵明嘅深情
東坡飲醉酒訓左又醒返
係呢種迷濛嘅精神狀態，佢忽然覺得：
陶淵明同我咁似，一定係我嘅前世！
由此，東坡就聯想到：
其實我呢個眼前東坡田園景色
同陶淵明當日係斜川見到嘅一樣嘅靚
「走遍人間，依舊卻躬耕」
我地讀呢句果陣
已經分唔到寫東坡定係寫陶淵明
兩個人嘅身影，係呢首詞入面重疊
醉中醒來，眼前已是晴天
昨夜嘅春雨，令到萬物都得到滋潤
烏鵲好似好開心咁同我講：
新嘅一天，真係好美好！
雪堂西畔暗泉鳴，北山傾，小溪橫。南望亭丘，孤秀聳曾城。都是斜川當日景，吾老矣，寄餘齡。
下半片寫景，呢個景卻係斜川、東坡景合一
詞人聽住東坡雪堂西邊，泉水係地下隱隱流動嘅聲音
順住流去北山傾落一條橫流嘅小溪
由北轉望南邊嘅山丘，上面有座小亭
呢一切一切，都係同陶淵明表達嘅理想田園景色一樣
係呢一刻，東坡接通自己嘅前世記憶
由眼前嘅東坡景，化做當年陶淵明遠望曾城
「都是斜川當日景」
我地必須留意，東坡係用「當日」
斜川景物，東坡早已透過對陶淵明文句嘅契合
係再三誦讀之中，深入腦海，直如真見
「吾老矣，寄餘齡」
陶淵明四十一歲棄官歸田
真係將晚年嘅餘生，投入係自己理想嘅生活
東坡嘅內心，又何嘗唔係想咁樣呢？
尤其身在黃州，仕途見唔到咩希望
本身又幾鍾意田園生活，唔係點會咁愛陶淵明
蘇軾「一生凡九遷」，他的坎坷的生活遭遇，使他對陶詩產生了深刻的思想共鳴。他的個人的品格和氣質也與陶潛相似，加之他的揉雜儒道佛的複雜的思想更促使他熱衷於寫和陶詩，所以後期的和陶詩的創作，不是一般的詩歌創作，這是蘇軾後期思想和生活的寫照，也是蘇軾藝術風格臻於成熟的集中表現。
——唐玲玲
雖然終其一生，東坡都無離開官職重責
甚至，佢係好多時候都積極咁入世
和陶詩之中，亦有唔少同陶淵明相反嘅諗法
但呢顆陶淵明前世之心，一直植根係東坡嘅心田
亦都係東坡困境之中嘅一大重要支撐
No comments:
Post a Comment