不合時宜，惟有朝雲能識我；獨彈古調，每逢暮雨倍思卿。
——東坡
——東坡
王朝雲，係東坡三段愛情入面最浪漫嘅一次
如果講王弗係好有主見嘅賢內助，比東坡行事嘅意見
王閨之係小鳥依人，維繫家庭
咁王朝雲就係同東坡精神境界互相感知嘅愛
王朝雲本身係委落紅塵嘅歌妓
係東坡早期任任杭州通判時
人地送左王朝雲比東坡做丫環
果陣王朝雲只係得十二歲嘅小蘿莉咋
自此之後，王朝雲一直陪住東坡
二十二年，東坡晚年流放嶺南，仍然不離不棄
中國古代嘅歌妓，往往能歌善舞
好多時仲要識埋琴棋書畫，和詩吟唱
王弗、王閨之都唔算有咩才學
東坡呢種大文學家嘅境界，只有王朝雲能夠了解
東坡、朝雲相遇係西湖呢種美景
朝雲果陣一身素淨衣裙，清麗淡雅
如天上仙女嘅美貌，加埋動人心弦嘅舞姿
難怪東坡後黎成日用「天女維摩」
即純淨不沾世間塵埃之意，黎形容朝雲
係果一刻，東坡嘅心已經被朝雲征服
王閨之死後，東坡納朝雲為妾
朝雲對東坡嘅理解，有兩個好出名嘅故仔
話說有一日，東坡摸住自己個大肚腩
周圍係到問人：
我個肚入面裝住咩嘢呀？
緊係好多人擦鞋
一個話：一定係學問啦，東坡你咁勁
一個話：我話係文章先真，唔係點寫咁多好文
東坡都笑笑口，唔係呀唔係呀
朝雲聽到呢到，忍唔住插嘴：
你呀，成個肚都係不合時宜
東坡即刻大笑，都係朝雲最理解我！
第二個故仔，係關於我地讀過嘅蝶戀花(花褪殘紅青杏小)
東坡人生第二次流放，同當年流放黃州相似
都係因為文字而受小人攻擊，只係呢一次佢已經老啦
好彩嘅係，朝雲係佢身邊相伴
有一日，蘇軾同朝雲閑坐
「時青女初至，落木蕭蕭，淒然有悲秋之意」
東坡就叫朝雲唱蝶戀花(花褪殘紅青杏小)
朝雲唱唱吓，突然間流哂馬尿
東坡緊係嚇親，即刻問佢：點解咁傷心？
朝雲就答：
「奴所不能歌，是『枝上柳綿吹又少，天涯何處無芳草』也。」
東坡因此終生不再聽人唱呢首詞
可見東坡對朝雲一言一語嘅重視
追隨著東坡長途跋涉，翻山越嶺
始終如一嘅朝雲
係生左一個仔，大量出血
捱唔到無耐，就死左啦
東坡係惠州西湖上起左座「六如亭」
以「不合時宜，惟有朝雲能識我；獨彈古調，每逢暮雨倍思卿」嘅楹聯
紀念朝雲一生嘅感知、相伴
朝雲，亦都係東坡最後一位情人
東坡 西江月(梅花)
玉骨那愁瘴霧？冰肌自有仙風。海遷時過探芳叢，倒掛綠毛幺鳳。
素面反嫌粉涴，洗妝不褪唇紅。高情已逐曉雲空，不與梨花同夢。
朝雲、東坡兩位係晚年同樣有宗教信仰
除死無大事，東坡緊係希望可以通過修行長生不老
而朝雲係呢方面都同東坡一齊努力
可以話佢地嘅愛情入面，充滿宗教嘅色彩
呢首詞雖然題為「梅花」
東坡一生最愛梅花，詠梅詩寫過好多
實則詠梅係表，而悼亡朝雲為裡
入面亦都運用大量嘅神仙典故
「玉骨那愁瘴霧」
嶺南成日都有瘴霧毒氣
呢到嘅王骨當然唔止梅花
更係講緊朝雲埋骨此地
但東坡話朝雲有神仙嘅玉骨
緊係唔怕呢種瘴霧啦！
所以東坡先會講：「冰肌自有仙風」
玉潔冰清，忠貞不二
係到講緊朝雲陪隨東坡幾次苦難
最後知道要去嶺南都未驚過
「海仙時過探芳叢，倒掛綠毛幺鳳」
海上仙人都成日黎睇呢邊嘅梅花
東坡係另一首詩自注：
嶺南珍禽，有倒挂子，綠毛，紅喙，如鸚鵡而小，自東海來，非塵埃中物。
「么鳳」產於四川，羽毛五彩繽紛，形貌如傳說鳳
「倒挂子」產於廣南，性畏冷，綠羽丹嘴，棲集皆倒懸樹枝
呢兩隻唔同嘅鳥，出現係同一句子
係為左令句子更美，更具神秘嘅仙家色彩
海仙、珍禽，都係為左映照朝雲嘅獨一無二
素面反嫌粉涴，洗妝不褪唇紅。高情已逐曉雲空，不與梨花同夢。
素面紅唇，清香襲人，係惠州梅花特殊色態
同時，都係借梅花天然不加任何人工色素嘅素雅
形容朝雲天生麗質難自棄嘅美
素面、洗妝，都係不改本色
對梅花、朝雲嘅歌頌
人花相寫，不斷同東坡、朝雲嘅相知一生映襯
朝雲本來大把理由唔跟去嶺南惠州
對東坡嘅愛，令佢無好似其他妾侍咁離開
最後亦都因此葬身於惠州
因此，最後兩句已經唔係人花雙寫
而係直接表白自己嘅悼念之情
東坡對朝雲，朝雲對東坡
呢種高尚嘅感情，已經好似早上嘅雲散成空
王昌齡〈梅詩〉曰：
「落落漠漠路不分，夢中喚作梨花雲。」
王昌齡係夢入面將梨花當做梅花
東坡呢到講：「不與梨花同夢」
係講緊此生嘅愛情已經用哂
朝雲死後，東坡無再愛上另一個人
曾經滄海難為水，除卻巫山不是雲
不合時宜，惟有朝雲能識我；獨彈古調，每逢暮雨倍思卿
東坡三位重要愛人，都比佢早死
睇落好似好悲咁，其實已經好幸運
能夠好似東坡咁愛情圓滿嘅人，又有幾多呢？
No comments:
Post a Comment