[古代思想入門（一）ep.23]簡介基本古代思想概念：樂教 兼讀荀子樂論篇（一）

中國各個朝代，尤其係周朝 
音樂都係一樣好重要嘅教化、社交、娛樂工具
所以先會有樂官呢個職位
而《詩經》、樂府、宋詞、元曲等等
當時都有音樂相輔相成咁呈現
不過好可惜嘅係，至今大部份中國古典音樂都失傳啦 

儒家係非常重視音樂嘅 
子曰：「興於詩，立於禮，成於樂。」
孔子將「樂」放係最後，做為人最後最重要嘅修養
呢到亦都反映音樂係連結內在德性，呈現儒家嘅道德美學
但係音樂呢樣文化嘢，係亂世係好易被忽略
甚至否定音樂嘅價值 

墨家非樂，反對無實用價值嘅音樂 
孔子、孟子都無詳細論及音樂嘅重要
所以墨家所提倡嘅睇法，對儒家樂教有重大打擊
荀子見到咁樣，當然要寫一篇嚴謹嘅文章啦
我地今日讀嘅樂論
正正係儒家第一篇講音樂講得好詳細嘅文章
先睇睇荀子點樣反駁墨家啦！ 

荀子 樂論篇二十
夫樂者、樂也，人情之所必不免也。故人不能無樂，樂則必發於聲音，形於動靜；而人之道，聲音動靜，性術之變盡是矣。故人不能不樂，樂則不能無形，形而不為道，則不能無亂。先王惡其亂也，故制雅頌之聲以道之，使其聲足以樂而不流，使其文足以辨而不諰，使其曲直繁省廉肉節奏，足以感動人之善心，使夫邪污之氣無由得接焉。是先王立樂之方也，而墨子非之奈何！

荀子首先好正面咁肯定：
音樂，就係快樂，人追求快樂係必然嘅事
人＞快樂＞化成聲音、舞蹈＞呈現人嘅性情變化
正因為人性本來就想追求快樂 
如果唔用一個恰當嘅方法導正呢種欲望
「則不能無亂」，咁一定會好亂架！

呢到上接荀子嘅性惡篇人性論
同時解釋音樂之起源
更進一步批評墨子話音樂無用嘅講法 
「是先王立樂之方也，而墨子非之奈何」
立樂，正正係導正人嘅欲望，以成全禮義道德

故樂在宗廟之中，君臣上下同聽之，則莫不和敬；閨門之內，父子兄弟同聽之，則莫不和親；鄉里族長之中，長少同聽之，則莫不和順。故樂者審一以定和者也，比物以飾節者也，合奏以成文者也；足以率一道，足以治萬變。是先王立樂之術也，而墨子非之奈何！

先王立樂嘅作用，係咁嘅：
君臣＞和敬
父子兄弟＞和親
鄉里族長＞和順
正所謂「以和為貴」，一個主音要無數和音配合
上下彼此互相調整，先可以成就好嘅音樂
係呢到，音樂亦都象徵統治國家嘅仁政 

故聽其雅頌之聲，而志意得廣焉；執其干戚，習其俯仰屈伸，而容貌得莊焉；行其綴兆，要其節奏，而行列得正焉，進退得齊焉。故樂者、出所以征誅也，入所以揖讓也；征誅揖讓，其義一也。出所以征誅，則莫不聽從；入所以揖讓，則莫不從服。故樂者、天下之大齊也，中和之紀也，人情之所必不免也。是先王立樂之術也，而墨子非之奈何！
除左講緊音樂對人際關係嘅作用
荀子亦都強調音樂對國家軍政嘅影響 
音樂可以令人心胸廣闊，令人嘅動作統一莊重
更重要係「出所以征誅也，入所以揖讓也」
對外＞征伐＞軍樂
對內＞教化＞禮讓
因此國君要令「天下之大齊」，音樂係好重要嘅

且樂者、先王之所以飾喜也；軍旅鈇鉞者，先王之所以飾怒也。先王喜怒皆得其齊焉。是故喜而天下和之，怒而暴亂畏之。先王之道，禮樂正其盛者也。而墨子非之。故曰：墨子之於道也，猶瞽之於白黑也，猶聾之於清濁也，猶欲之楚而北求之也。
先王用音樂表達快樂，用軍隊刑具表達憤怒
呢兩種呈現都係恰當嘅統治 
「是故喜而天下和之，怒而暴亂畏之」
就係咁，天下因先王快樂而和諧，因先王憤怒而畏懼

但係墨子竟然話音樂無用
就好似盲人分唔到黑白，聾人分唔到聲音嘅清濁
想到南方嘅楚國但竟然走左去北方
荀子話墨子呢種諗法，真係超低能勁白痴囉！