Wednesday, November 22, 2017

[現代藝術入門(一)ep.21] 慢步隆河感受梵谷無限愛意


今次要講嘅畫就係星空三部曲入面嘅第二部 隆河上的星夜
之前有提到所謂嘅星空三部曲就係 「夜間露天咖啡座」 「隆河上的星夜」 「星夜」呢三幅畫
我地睇「夜晚露天咖啡座」知道梵谷當時愛上左夜晚嘅景色,幅畫完全表現出夜晚幽深神祕嘅魅力
今次嘅二部曲更加強化左夜空同星星嘅位置,但今次帶黎嘅唔再係寂寞,反而係一種好巨大嘅愛


Starry Night Over the Rhone, 1888, Van Gogh


畫面構圖係用一條地平線分格開天空同地面,而地面就分開對岸、河流同近岸

天空懸掛住無數發光嘅星星,而對岸亦都亮起無數嘅燈火
所有嘅光影都被河水接納並且反映到我地面前,湖光倒影從對岸一直延伸至近岸
而近岸邊有幾隻小船停靠係到,有禾草堆係旁邊,最下方有一對情侶
成個畫面好簡單,係一個好常見嘅風景結構,並無特別花巧之處#oh#

不過係筆觸上就有幾點值得我地留意下
我地首先需要睇嘅係梵谷點樣用唔同嘅筆觸處理不同嘅部分
畫上中下三部分梵谷就用左三種不同嘅筆觸去處理
而呢啲筆觸又分別帶出咩嘅感覺呢


點解要分開三種唔同筆觸?_?
要了解呢幾點就先睇下「隆河上的星夜」嘅草圖

呢兩幅草圖嘅夜空部分都只係用橫筆黎畫,反而隆河先用十字筆觸
不過有可能梵谷係草圖上想表現隆河比夜空暗,所以先用十字筆觸表達更暗
但當我地仔細咁睇返原畫,會發現夜空上嘅星光出現得唔太順暢,有部份嘅光芒比夜空嘅筆觸遮蓋左#oh#

咁姐係話,梵谷先畫左第一層嘅夜空,再畫星星
之後再畫多一層十字筆觸嘅夜空,而呢層十字筆觸嘅夜空有部分筆觸就遮蓋左少少星光嘅筆觸。
如果係咁就奇怪啦#???# ,因為我地畫畫通常係從後畫上前,咁先唔會令前景嘅事物比後景遮蓋。
梵谷咁樣回頭上多一層背景顏色係為左啲咩,點解佢要不惜工本咁重畫一次呢?_?

我地先睇下原本底個層顏色先

呢幾張圖係畫中嘅星光,放大會睇到圖中加左啲紅線
紅線嘅上下方仔細睇會見到隱藏係星光背後嘅橫向筆觸
因為顏料有厚度,當佢乾透之後會突出黎,所以會顯示上一層嘅顏料嘅筆觸


咁姐係話,梵谷係畫星光之前,背景嘅筆觸大多數係用橫向筆觸,同草圖一樣
代表住梵谷一開始用橫向筆觸畫後景嘅夜空,再畫前景嘅星星
但因為某啲原因令佢改用十字筆觸畫多次夜空,造就左依家嘅夜空
要了解梵谷點解改用十字筆觸就要先睇下各種筆觸嘅用法


夜空從筆觸上可以分為三部分

紅圈最光嘅係橫筆觸
綠圈最暗嘅係直筆觸
黃圈係中間色,用嘅係橫直交錯嘅十字形筆觸


梵谷呢個畫法分為三部分,分別係最光最暗同中間色
夜空嘅正中央就比較光亮,筆觸都偏向用橫向嘅短促筆觸,可以推想為夜空中嘅雲霧,而雲霧背後隱藏月光,所以比起天上其他位置都光

而最暗嘅地方係右上同左上

而其他部分就係中間色
留意下三者嘅筆觸有咩分別
最光嘅中間基本係由橫筆觸構成

不論係長或短,方向性都係一致
就算係圍繞住星光嘅筆觸都係用橫筆

如果你落筆畫,其實係可以一下直筆就遮蓋到,跟本唔需要畫咁多下
點解梵谷咁執著係呢個區域用橫筆呢?


我地再睇最暗嘅部分
左上

右上

係最暗嘅地方梵谷主要用直筆表達


我地見到夜空部分嘅筆觸分配
最光位用橫筆,最暗位用直筆,而兩者嘅中間色就用橫直交錯嘅筆觸表達
咁我地可以返去前面個問題,點解要將原本嘅橫筆觸改用十字筆觸?
呢三種唔同嘅筆觸有咩唔同

係了解橫筆直筆之前,我提少少藝術元素
由康丁斯基嘅「點線面」呢本書撮要出黎,講一啲比較特別嘅概念同感覺
先簡介下,康丁斯基係抽象藝術嘅先驅之一#adore#
而當時嘅抽象並唔係突如其來,係先驅們一步步從理論中建立出黎
而「點線面」呢本書就係佢嘅其中一本著作,目的係探討藝術元素嘅本質
用更精確嘅詞彙去整理分類藝術
所以當我講到關於筆觸線條呢類,比起描述感覺,我更傾向大家先了解本質#hoho#


係藝術元素入面,點線面係非常基本嘅一環
「點」係一切嘅開始,係結束,亦係上文下文之間嘅橋樑
係習慣上我地會認為封閉嘅圓點係無聲,係沉默
但當點離開文字或者形象,「點」嘅聲音就會變得好強勢,愈黎愈清晰有力
「點」無時間性同方向性,佢係一個面,亦都係
康丁斯基提到,「點」係想像中抽象中係完美地小,完美地圓
但實際上「點」有無數個造型,可以發展為自由嘅形態,無界限
所以佢認為「點」嘅基音係各式各樣,變化性係因應色彩而定,「點」只係純粹發出聲音。


「線」係「點」移動嘅軌跡,係「點」從靜態跳到動態嘅結果
「線」一定包含住張力同方向,康丁斯基先將「線」分為三種基本類型
先係水平線
想像中嘅水平線係一條直線,可以為人所站立嘅平面
感覺係一個冷而穏嘅基面,平坦咁無限延伸落去
「冷、平」就係水平線嘅基本調子
所以水平線形容為「無盡的冷性運動的最簡形式」

同前者相反,並與之成直角形嘅係垂直線
佢伸向高處,取化前者嘅平坦,佢係暖,代替前者嘅冷
所以垂直線形容為「無盡的暖性運動的最簡形式」

第三種就係對角線,係前兩者嘅變化體
帶住同等嘅冷同熱,形容為冷熱無限運動的最簡形式
而其餘嘅線只係對角線稍加變化嘅結果,不同嘅冷暖傾向就決定佢內在嘅聲音
講到呢到先,有興趣嘅可以去睇埋佢講折線同曲線
而「面」就留返下次啦


睇到呢到,開始了解到直筆橫筆會帶黎咩嘅感覺同佢地嘅基礎音色
夜空上最光位嘅筆觸係短促、橫向
短促嘅筆觸可以視為「點」,而「點」其中一個特性係純粹發出聲音,會將其內在放大,引致橫線嘅「冷、平」,藍色色調嘅「冷、平靜、安寧、沉實」以上感覺都無限放大
最暗位嘅直筆就用垂直線嘅特點將視線從最頂拉向下,有種夜幕低垂嘅感覺
而垂直線嘅移動性更大,比起水平線會更有跳躍同速度感,再加上用色深沉,更有下沉嘅感覺。


我地再跟返草圖嘅筆觸,想像一下整個夜空都用橫向筆觸,所帶黎嘅平靜、詳和同憂傷都會變得更強烈,而且同河流筆觸相同,成幅畫嘅味道都會變得單一
另外如果全用直筆就更難表達,夜空嘅空曠同深遠係好難單純用直筆去表達,氣氛會變得奇怪
所以單純用橫或直根本表達唔到更多嘅層次
梵谷就將全部合埋一齊用,分別引出夜空唔同嘅味道


所以整個夜空畫面結構用左三層
正中央畫嘅雲霧,用橫筆特點帶出雲霧嘅平移,安寧穏定,引出夜空嘅寧靜幽美
從中央向外延伸嘅就係橫直交錯嘅筆觸,係呢種筆觸下感受到嘅並唔係只有寧靜平和嘅夜空,而係更具複雜性,有神祕魅力嘅夜空#love#

大家仲記唔記得上幾篇提到梵谷為星痴狂嘅信件,佢甚至應為到達星星可以不妨一死@_@
呢種對星夜嘅愛同好奇某程度投映左落幅畫到,係呢啲十字筆觸嘅部分我睇到夜空嘅魅力,睇得越耐,越感受到夜空嘅神秘感,深遠,同複雜性,而呢一切並唔係單用橫筆直筆就表達到

到呢到我地終於明白梵谷點解要改變草圖嘅橫筆夜空,特意重新畫多一層十字筆觸去遮蓋之前嘅橫向筆觸
梵谷想表達嘅並唔只係寧靜詳和、廣闊舒坦呢啲咁單一嘅感覺
佢更想帶出夜空係深邃無際,富有色彩#good#
最後就係講埋下半部
首先係隆河,呢條河係畫面嘅中層,被夜空同近岸夾住,而且對岸都有啲房屋教堂等建築物
最特別嘅係畫中所有燈火、星光都反映係隆河嘅波折上
仔細留意下會發現比較明亮嘅星光都同對岸燈火嘅位置係相同
所以河上嘅倒影就係同一個位置映照住兩種不同嘅光芒

好明顯並唔係巧合,係梵谷刻意安排嘅位置
從技巧上,咁樣做可以令視線集中係同一排列上,垂直線引導你向上或向下望
從而引出兩者意義上產生關聯,更會加強引導目標嘅重要性
意義上,燈火、星光同樣都係光芒,兩者分別在於一種可接觸,另一種只能遠觀
所以梵谷就用倒影去串連兩者,安排星光同下方嘅燈火相同排列,再用倒影從對岸一直延伸至近岸,成個關係就如同一條引導線,引領你從岸邊一步步前往到星星
呢幅畫就實現左梵谷曾經提及過嘅諗法,借用燈火嘅倒影連繫到天上嘅星星,實現到達星星之處


最後就係前景,有幾隻小船停泊係岸邊,旁邊仲有堆稻草,右下有一對情侶慢步河岸

夜空好似陽光揮灑大地一樣,為黃綠色嘅岸邊增添一層晚間嘅色彩’
前景嘅兩個人可能係想引導觀者入畫,或是梵谷借人像投影自己落去?始終佢自己好渴望組織家庭

另一樣比較有趣嘅係左下角
你會感覺左下嘅筆觸特別混亂,有好多突出黎嘅線條

呢啲突出嘅線條其實黎自上一層嘅料
留意下呢啲線條嘅方向就會發現係一致
只要我地睇返前面嘅草圖就唔難理解啲線條出現嘅原因
原本嘅構想係兩岸相連,黃綠色嘅地面應該一路向左延伸直至對岸

睇呢個凹位就知道本來佢地嘅構圖係一樣
但最後梵谷用一層新嘅顏料遮蓋左原本草圖嘅構圖安排
情況就等同夜空嘅橫向筆觸一樣
明顯因為梵谷並唔滿意根據草圖所畫嘅作品,所以再次修改
更改整個夜空嘅筆觸,岸邊嘅大小
咁樣一改近岸嘅位置,距離感立即增強數倍
令梵谷同對岸嘅人有一條無法跨越嘅河,星光嘅距離更加遙遠更加無法觸碰
就好似梵谷當時嘅生活狀態一樣:-( 


成幅畫中最能感受到夜空嘅複雜性,並唔係只有平靜廣闊深遠,仲有種神秘無限無法接觸嘅魅力,引起我興趣去接觸去了解夜空
而畫面嘅星光同燈火帶出嘅係一種明顯但又慢慢滲透出黎嘅快樂,更感受到梵谷對星光嘅寄語,有種希望嘅光芒


「隆河上的星夜」唔單單係描繪風景,仲有一種平靜、安寧嘅詩意
更感受到夜空深邃無際神秘嘅魅力,而係呢個背景之下,星光同燈火從中跳出黎,帶住開心同希望,透露出對日後生活嘅衝勁
而最深深處會隱約感受到梵谷隱藏其中嘅愛意;-)

No comments:

Post a Comment