熱情、健談、外向、風趣，甚至好無厘頭
呢種由外到內，再由內去返外嘅性情
令東坡係呢個歷史洪流入面，留下許多歡笑嘅喜劇
我地先講東坡同王安石
王安石主張新法，東坡係反對嘅，兩個係政敵
除左係朝廷互相爭論，私下成日互串
王安石對文字學有研究，寫左本《字說》
但其實入面唔少對字嘅解釋都係鳩吹
有一日東坡見到王安石
東坡好好聲語咁講：
你本書好勁！你話鳩字係從九從鳥，一早就有證據啦！
王安石好開心咁問：
吓？係咩？我自己都唔知
東坡笑笑口咁講：
《詩經》話「鳲鳩在桑，其子七兮。」
七隻雀仔，加埋老豆老母，咪九個囉！
東坡又問：
王大師，坡字點解係咁寫嘅？
王安石就話：
土嘅皮，即係坡！
東坡笑住咁講：
哇！咁滑字咪係水嘅骨頭囉！
仲有件事係好出名，東坡令到人地直到今日都笑緊
陳季常係東坡嘅好朋友，佢老婆柳氏勁惡
搞到陳季常平時好驚佢，成個老婆奴咁
東坡有見及此，唔安慰佢之餘，仲要笑佢
咁文人最叻笑人係點呢，緊係寫詩啦！
〈寄吳德仁兼簡陳季常〉
誰似龍丘居士賢，談空說法夜不眠。
忽聞河東獅子吼，拄杖落手心茫然。
邊個似陳季常你咁叻，平時講嘢咁鬼勁
一聽到老婆叫，即刻驚到手震震
「河東獅吼」，「季常之癖」
笑一笑，世界從此多左兩個成語
東坡 南歌子(師唱誰家曲)
師唱誰家曲？宗風嗣阿誰？借君拍板與門槌。我亦逢場作戲，莫相疑。
溪女方偷眼，山僧莫皺眉。卻愁彌勒下生遲。不見老婆三五，少年時。
據《冷齋夜話》載：
東坡鎮錢塘，無日不在西湖。嘗攜妓謁大通禪師，師慍形於色。東坡作長短句，令妓歌之。
即係話，東坡係杭州做官果陣
有一日同歌妓一齊去搵老友大通禪師
佛門清靜地，大通禪師緊係好嬲啦
東坡即時作首詞，叫歌妓唱比佢聽
喂大師你係邊唱咩歌，跟邊門佛法？
可唔可以借你嘅木魚黎用？
我同你都係人世間逢場作戲，又點使咁疑惑呢
我呢位妓女望你幾眼，你唔好皺眉啦
如果你呢邊年輕嘅僧人早生幾年
就知道你以前有幾咁風流，食過嘅女已經都變哂老太婆
睇黎東坡一早知呢位和尚以前嘅情事
特登黎笑吓佢咁，真係好衰呀！
東坡 踏莎行(這個禿奴)
這個禿奴，修行忒煞。雲山頂上空持戒。一從迷戀玉樓人，鶉衣百結渾無奈。
毒手傷人，花容粉碎。空空色色今何在。臂間刺道苦相思，這回還了相思債。
東坡係杭州仲審過一件情殺案
有個和尚，愛上妓女，但有日用哂錢啦
咁妓女認錢唔認人，都好正常，仲要對你甜言蜜語咩
和尚有日頂唔往，想係深夜強姦佢
妓女抵死不從，結果和尚一下大力金鋼掌打死佢
東坡仲發現和尚嘅手臂紋左句詩：
「但願生同極樂國，免教今世苦相思。」
東坡呢個時候忍唔往，又寫左首詞
呢個「禿奴」真係無咩修行，咩戒都破哂
為情所困，搞到自己好狼狽
「毒手傷人，花容粉碎」
而家你要爭嘅色相，又去左邊呢？
東坡最後就決定：
好啦，咁就好似尔嘅紋身咁
你地就一齊落黃泉
用生命去還返呢場相思債
推出去斬立決！
No comments:
Post a Comment