方便說明，我設定畫入面有樣嘅四位農民從左至右係ABCD
呢幅畫第一眼我會望左落去人物(B) ①到，主要係因為最近光源
但點解係人物(B)唔係人物(C)呢
因為人物(B)頭上有頂明度高嘅帽，所以視線自然會吸引去(B)而唔係(C)。
但你係呢一下其實累積左一種好奇感係人物(C)嘅面上
之後就會加強你停留係人物(C)嘅時間。
再由①去②，因為人物(B)嘅視線，直望去人物(A)。
②去③，呢到有兩種路線
第一係去佢兩個隻手到，因為佢地隻手同埋餐枱上薯仔嘅受光面
第二係②直接去④，然後枱上嘅③會係睇⑥嘅時候先再移動過去睇。
③去④，係基於②嘅視線，係②去④嘅一個途經地
而②去④嘅過程會比人物(C)再次吸引，所以你會係睇④之後立即睇⑤
睇④係一個極短嘅過程，你會一瞬間去睇⑤
了解過後會因為⑤嘅人物視線再返去睇人物(D) ④。
視線返去人物(D)個時，你會由上至下咁睇，所以會去⑥
⑥呢個位就睇到點解Van Gogh要畫人物(D)一隻手指向下
其實呢到係一個引導，引導你去向下向外，你會走去睇個女孩、茶壺。
而手指向下除左產生動勢之外
我會覺得隱約係說明農民對大地嘅情
佢地生活嘅一切都依靠住大地，當中表達到農民對大地有種嚴肅尊敬
亦都係Van Gogh 對信仰投射嘅感情。
⑥去⑦，⑦個位女孩形體係下闊上窄，所以個動勢係向上。
引導你去最上嘅空間⑧同⑨
呢到講一下呢位女孩嘅存在目的
係食薯者入面，只有佢係無正面，無動作
連佢係咪食緊薯仔你都無從考究
點解咁奇怪呢？
係Van Gogh 荷蘭時期入面，讚頌勞動者嘅作品系列，入面自命非凡之作
會出現一位非勞動者嘅人物兼且坐落係畫面正中央
非常奇怪
其實佢就係我地，亦都係Van Gogh 佢自己
呢個女孩嘅背影擋住我地
令我地只能夠安靜旁觀而不能干涉
去感受勞動階級帶比我地嘅所有
對佢地投射一種莊嚴同崇高嘅形象，同時又以同情嘅目光安靜咁凝視
而女孩呢個形象坐係到同農民一齊食薯仔
係帶出我地被農民照顧，食住佢地種出黎嘅野黎生存
返黎⑦去⑧同⑨
去⑧先都係因為佢有一個相對明亮嘅宗教畫框同掛牆鐘
然後就引導去埋剩低嘅⑨
最後係⑩，呢到放一個茶壺目的係填補右下嘅空位
你可以試諗下嗰個位如果空左，就會有一個奇怪嘅焦點，特別空洞。
⑩之後會好快咁去睇左下角，人物(A)嘅凳⑪
最後我放張示意圖
視線停留愈耐愈多紅色
經過咁多說明，了解到Van Gogh 嘅脈絡
比起一開始我放呢幅畫出黎個時
你依家再去睇返呢幅食薯者，會唔會有新嘅感受同睇法呢
睇佢呢種駕馭整幅畫嘅能力
睇佢係信仰上急切地救贖苦難而訴諸藝術嘅心情
睇佢對食薯者昇華到如同基督教入面嘅最後晚餐
呢種係藝術嘅一種美
The Potato Eaters, 1885 Van Gogh
No comments:
Post a Comment