不論中西方，都會發現成日有典故
掉返轉頭去諗，現代嘢好似好少會咁
點解會咁樣呢？
我地講過，中國古代係「不學詩，無以言」嘅世代
上層知識分子之間嘅交流，詩係一種好重要嘅工具
亦都因為咁，詩嘅世界本身就形成左詩文化、詩語言
用典故，就好似inside joke咁，並唔係一件難事
當詩人嘅對象都係詩文化嘅讀者，自然會講詩語言
同今時今日講潮文個情況係相似嘅
中國古詩，點解可以咁精緻，咁簡短嘅情況
呈現出中國古典文學嘅最高峰？
我地必須了解：
詩唔止係單純嘅藝術品，而係一種龐大、豐富嘅詩文化
詩文化代表左，詩人只要運用短短一兩句文字
可以召出歷代的古魂，可以喚起神話的怪誕，可以昇華植物的精神
歷史人事、神話傳說、哲理思想、民間風俗等等
每一種都係詩文化入面累積，每一種都潛藏著厚實的泉源
每一種典故運用得好，都係呈現左詩文化嘅美
宣室求賢訪逐臣，賈生才調更無倫。
宣室：帝王住嘅正室
賈生：賈誼，西漢文人
李商隱呢首詩以人作題，係一首「詠史」之作
所以要理解呢首詩，必須先知道賈誼一生
根據史記講：
「賈生名誼，雒陽人也。年十八，以能誦詩屬書聞於郡中。吳廷尉為河南守，聞其秀才，召置門下，甚幸愛。……廷尉乃言賈生年少，頗通諸子百家之書。文帝召以為博士。」
賈生係一個充滿才華嘅年輕人
漢文帝好欣賞佢，就比佢做左史上最年輕嘅高級教書人
好可惜嘅係，後來佢建議新禮制果陣
比埋老屎忽反對，皇帝唯有外放佢去第二到做官
邊個鍾意比堆老屎忽玩，賈生緊係勁唔開心
期間仲寫左好出名嘅《弔屈原賦》
後黎雖然返左去，做左太子個老師
「居數年，梁王騎，墮馬而死，無後。賈生自傷為傅無狀，哭泣歲餘，亦死。賈生之死時年三十三矣。」
點知過左無耐太子死左
賈生覺得係自己責任，其實關鬼佢事咩
結果傷心到死左，果陣先得三十三歲咋陰公
呢兩句正正係講緊，賈生被人反對流放外地
有一日漢文帝無啦啦諗到條千古難題
希望搵到賢士黎解答
而果陣最醒目嘅就係賈生
頭兩句都係好強調漢文帝嘅覺醒
賈生終於可以一展平生之學啦
史記講：
後歲餘，賈生徵見。孝文帝方受釐，坐宣室。上因感鬼神事，而問鬼神之本。賈生因具道所以然之狀。至夜半，文帝前席。既罷，曰：「吾久不見賈生，自以為過之，今不及也。」
賈生作為一個咁醒嘅文人
作為一個中國古代知識分子嘅一流人物
但被皇帝流放左去長沙，再突然叫佢返黎
試幻想吓，果刻賈生係幾咁期待
自己治國平天下為萬民著想嘅大志終於可以用得著啦！
點知……
原來皇帝只係想問佢鬼神嘅迷信嘢
「可憐」呢個字，當然係李商隱嘅睇法啦
同時間，佢作為一個「沈淪下僚」嘅人
都係表達緊自己嘅自傷自憐之情
兩個同樣咁出色嘅文人，同樣都係懷才不遇
「虛前席」係形容緊皇帝同賈生坐係地下
「不自知膝之前於席」，聽到入哂神虛心受教咁
但一切都係空虛不實，一切都係妄為嘅
「不問」和「問」之間係一大對比
同時間都係最大嘅諷刺
個情況好似係高官去車公廟為香港祈福咁
李商隱寫呢一句果陣，係好深刻感受到果一刻嘅荒謬
似乎係充滿左憤怒咁揮筆書寫
李本身因為一生都不受重用，同樣係早死
詩人以生命去讀歷史，讀歷史嘅共鳴寫下詩句
呢一個典故，除左係詩文化傳統之美
亦係李之生平入面互相呼應，成為左佢一生嘅註腳
賈生
宣室求賢訪逐臣，賈生才調更無倫。
可憐夜半虛前席，不問蒼生問鬼神！
No comments:
Post a Comment