可以睇得出李商隱係深受愛情悲劇之苦
佢曾經寫過〈贈華陽宋真人兼寄清都劉先生〉
〈月夜重寄宋華陽姊妹〉等詩中
可以睇得出佢曾經學道，希望超越男女愛情嘅苦惱
今次我地讀呢一首詩，係李商隱特別作品
既用左好多道教典故，又以愛情為主題，矛盾掙扎
可以話總結左佢成世人嘅愛情觀
多段愛情無疾而終，終於同佢老婆「目成心許」
一見鍾情，又相處得好好
可惜嘅係，愛侶先於自己逝世
李商隱係愛情黎講，真係一個好可憐嘅人
悵望銀河吹玉笙，樓寒院冷接平明。
睇題目就知，呢首又係「類無題」
基本上只係將首詩第一句放做題目
並唔能夠幫助我地更了解首詩
「銀河」係中國係有牛郎織女嘅愛情典故
呢個典故係中國文化愛情悲劇典型
牛郎織女代表農業社會男女性角色
牛郎織女相愛結婚，但又要分開係因為「男廢耕，女廢織」
日日只係掛住談情說愛，不務正業
天帝震怒，限制佢地一年只能見一次
銀河就係分隔佢地嘅楚河漢界啦
因此，李商隱用七夕典故
並唔係單純咁用，而係好有共鳴
係佢成世對愛情嘅「悵望」
「吹玉笙」，又係另一個愛情典故
《列仙傳》：「王子喬者，周靈王太子晉也。好吹笙，作鳳鳴。游伊洛之間，道人浮丘公接以上嵩高山。三十餘年後，求之於山上，見桓良曰：告我家，七月七日待我於緱氏山頭。至時，果乘白鶴駐山頭，望之不得到，舉手謝時人，數日而去。」
簡單黎講，就係王子喬修道成仙，又好鍾意吹笙
我地並列兩個典故意象
前者講愛情悲劇，後者說修道成仙
似乎係一種矛盾，但正係咁樣
先表達到詩人複雜嘅情緒，矛盾衝突
「寒」、「冷」既是寫實
又係呈現緊詩人面對呢種衝突嘅心境
長夜不眠，淒冷寂寞
漫長之折磨，未嘗唔係詩人之寫照
重衾：回憶
羈雌：漂泊不定的雌鳥
昔日嘅愛情，昔日嘅愛侶
過去種種纏綿恩愛嘅美夢都一一逝去
愛情已「斷」，再無接續之可能
「羈雌」同詩人係好相似嘅：
1.同樣羈旅在外，漂泊不定
2.沒有情人，形單隻影
3.因晚上不安而鳴叫（作詩）
棲息在陌生樹木嘅雌鳥
又一次係晚上受驚，飛去別的地方
前一句係描述詩人嘅回憶
後一句係以意象講緊詩人嘅故事
不斷去尋找愛情嘅安頓
但同時間亦係無盡嘅失去愛情
每一次都係受「驚」，每一棵樹都無法棲身
月榭：月光籠罩嘅高臺
故香：花
花之能於高臺「香」
係因為「雨」水嘅滋潤先會開花
詩人借此追憶過去嘅情愛
「雨露之恩」，係愛情嘅開花結果
但係如今詩人無眠直至天亮
簾幕被「風」吹得動盪不安
蠟燭都係「殘」
心中嘅熱情只係得返微弱嘅火光
外在嘅環境係「霜清」
過去與現在
愛情之火與現實之冷
整首詩一層一層好似洋蔥咁剝開
細味當中詩人嘅人生衝突
湘瑟：湘妃所彈之瑟，指樂器
秦簫：簫史弄玉嘅典故，指樂器
李商隱最後點樣回答自己嘅愛情？
「緱山」係王子喬典故入面，代表修道成仙
詩人係到下左一個判斷語：
何必仲要多諗點樣修道成仙呢？
呢句可以上連返第一句「吹玉笙」
由追求至否定，扣連成首詩黎睇，更有味道
《列女傳》：「帝堯之二女，長曰娥皇，次曰女英，堯以妻舜於媯汭。舜既為天子，娥皇為後，女英為妃。舜死於蒼梧，二妃死於江湘之間，俗謂之湘君。」
湘妃為愛而死，雖然係悲劇，但卻成為愛情偉大嘅典範
《列仙傳》：「蕭史善吹簫，作鳳鳴。秦穆公以女弄玉妻之，作鳳樓，教弄玉吹簫，感鳳來集，弄玉乘鳳、蕭史乘龍，夫婦同仙去。」
蕭史同弄玉結為夫妻，吹簫引來鳳、龍，成仙而去
愛情完滿嘅象徵
詩人經過內心曲折嘅幽微之處
用左大量嘅神仙典故，反而到最後係肯定男女情愛
李商隱一生愛情雖苦，曾經欲求超脫
但曾過發生嘅喜悅，曾經相聚過嘅日子
始終係佢人生中最大嘅寶物
回到俗世，萬物「自有情」
無情不如有情，何必追求仙夢呢
呢一首絕對係了解李商隱愛情嘅經典之作
大家一齊再細細品味一次：
銀河吹笙
悵望銀河吹玉笙，樓寒院冷接平明。
重衾幽夢他年斷，別樹羈雌昨夜驚。
月榭故香因雨發，風簾殘燭隔霜清。
不須浪作緱山意，湘瑟秦簫自有情。
No comments:
Post a Comment