東坡 枯木怪石圖
何謂文人畫？即畫中帶有文人之性質，含有文人之趣味，不在畫中考究藝術上之工夫，必須於畫外看出許多文人之感想，此之所謂文人畫。
——陳師曾
中國繪畫藝術，有一派相當重要：文人畫
咩係文人畫呢？
即係士大夫呢種文人階級嘅畫
所以又稱做士人畫
正好似東坡講嘅：
「觀士人畫，如閱天下馬，取其意氣所到。乃若畫工，往往只取鞭策皮毛槽櫪芻秣，無一點俊發，看數尺許便倦。漢傑真士人畫也。」
追求嘅唔係畫匠作品嘅形似
而係要求神似，要有言外之意
「詩不能盡，溢而為書，變而為畫。」
亦都係呢個時候開始，詩書畫三樣嘢結合埋一齊
繪畫、書法、詩詞缺一不可
東坡 瀟湘竹石圖
東坡正係中國文人畫嘅先行理論創造、實踐者
其實更早對東坡有知遇之恩嘅歐陽修已經提倡：
「古畫畫意不畫形」，客觀嘅外形並唔係最重要
「此畫此詩兼有之」，文人作詩重意，畫亦同之
東坡接受呢種講法，論述得更加細膩：
論畫以形似，見與兒童鄰。
賦詩必此詩，定知非詩人。
詩畫本一律，天工與清新。
邊鸞雀寫生，趙昌花傳神。
如果繪畫只求形似，咁同細路仔有咩分別？
即係好似寫詩寫唔出新意，一定唔係一個勁嘅詩人
唔係話形無用，但形之外有更高追求
我地必須注意「詩畫本一律，天工與清新」
呢到正係文人畫好強調嘅詩、畫合一，其理相通
而家嘅人話王維係「詩中有畫，畫中有詩」
呢句評語正正係出自東坡口中
咁呢種意要點反映呢？
東坡話，作品嘅高度建基於個人嘅修養
於潛僧綠筠軒可使食無肉，不可居無竹。無肉令人瘦，無竹令人俗。人瘦尚可肥，俗士不可醫。旁人笑此言：「似高還似痴？」若對此君仍大嚼，世間那有揚州鶴！
世間嘅俗人，畫匠詩匠只求外在嘅價值，外在嘅形似
而真正嘅雅士係可以追求內在嘅修養，再將佢表達出黎
東坡將內在嘅追求，比喻對竹嘅欣賞
俗士會笑呢種君子之竹，根本係無用多餘
如果對住雅事仍抱住俗世肉慾，又點會有真正嘅藝術？
東坡 偃松圖
我地不妨係到觀賞東坡嘅名作偃松圖
東坡嘅畫主要題材係「枯木竹石」，成為文人畫主要嘅題材
睇呢幅畫作嘅時候，我地一定會比主角「偃松」吸引
偃松，即係躺臥嘅松樹
睇到呢邊，一定會有一個疑問：
點解要畫呢棵咁奇形怪狀嘅樹？
再更進一步
我地要問點樣東坡咁鍾意「枯木竹石」？
呢到正正扣連東坡受「烏臺詩案」之累
去到黃州呢個窮鄉僻壤嘅地方
因為詩文而受累，東坡轉而全心投入於詞於繪畫
繪畫嘅形式，容許東坡以隱約嘅手法表達自己嘅真情
從畫作當中，反映東坡經苦難後嘅人生態度
畫入面嘅偃松，係東坡自身嘅映照
因為客觀外在條件的不幸，偃松唯有橫向生長
面對呢種困難，佢依然能夠征服
粗壯嘅枝幹，多重嘅扭曲，表達一種壯美
呢種壯美係不甘於環境嘅局限
極力掙扎，於世界種種限制中周旋衝突
一切嘅不自然，一切嘅奇形怪狀
東坡曾經受過嘅誹謗，曾經受過嘅殘酷
種種災難，都唔係輕描淡寫可以忽略
人生真正嘅不幸，必然會係生命形成無數傷痕
東坡知道：
我地無法改變事實，但我地唔可以一蹶不振
偃松曲線嘅怪異，係人生必定經驗嘅挫敗
但我地睇東坡呢幅畫，並唔會覺得偃松好無生氣好慘
反而從東坡嘅線條，東坡特意扭轉嘅形狀
細看之下，就能夠感受偃松翻騰於雲霧嘅美感
正因為偃松出生嘅不合自然，成就偃松整體嘅壯美
正如東坡偃松圖自題：
「怪怪奇奇，蓋是描寫胸中磊落不平之氣，以玩世者也。」
東坡「枯木竹石」之主題，必須連結佢嘅人生觀賞
物純得形似，只係死物
而東坡以詩心觀之，深入物之本質，投注自身性情
「枯木竹石」，經大苦困之人方可成就大美
東坡諸多畫作，應作如是觀
No comments:
Post a Comment