對蘇東坡要從兩方面來看。一般人所欣賞的是蘇東坡的豪放和超越，是他跳出去的那一面。但蘇東坡不光是豪放超越的，蘇東坡也有他對人生的很多悲慨，只不過他能夠不被悲慨所拘限，在悲慨之中有他豪放超越的氣概。在天風海濤之曲裡雜有幽咽怨斷的聲音。
——葉嘉瑩
——葉嘉瑩
東坡曾經抒發過「老夫聊發少年狂」嘅英雄氣概
但我地必須明白，東坡呢種只係偶一為之嘅狂
並唔係佢可以成日表現到出黎嘅豪放
亦因此，呢種作品真係少之又少
係黃州呢段重新省視人生嘅時期
東坡將偶一為之嘅狂放，轉變為深沉嘅哲思
係呢邊我地可以睇得出，東坡開拓豪放有兩種形態：
1,「英雄之豪壯」，南宋辛棄疾詞作常見
2.「哲人的超曠」，東坡嘅生命主調取道於後者
故有論者提出「蘇曠辛豪」，可謂貼切嘅形容
東坡 臨江仙(夜歸臨皋)
夜飲東坡醒復醉，歸來仿佛三更。家童鼻息已雷鳴，敲門都不應，倚杖聽江聲。
長恨此身非我有，何時忘卻營營。夜闌風靜縠紋平，小舟從此逝，江海寄餘生。
時光飛逝，東坡黎到黃州已經三年啦！
佢已經由定慧院，搬左去臨皋亭
亦都係呢個地方，佢終於覺醒要超脫人生
東坡之所以叫做東坡，亦都係呢個時候開始
蔣勳係咁樣講呢個故仔嘅：
黃州東邊鄉郊處有塊坡地，蘇軾就在旁安了家，並且在坡上種些糧食蔬菜維持生計。而他更以「東坡 」二字自居。東坡、東坡，死去了蘇軾，新生了東坡。
係呢塊田地附近，東坡更自建「雪堂」
呢首詞嘅創作動機，正係東坡係「雪堂」同朋友飲酒大醉
係佢返去住所「夜歸臨皋」果陣，突然有感而作
夜飲東坡醒復醉，歸來仿佛三更。家童鼻息已雷鳴，敲門都不應，倚杖聽江聲。
上半片著重「醉歸」無人情況嘅描述
詞人係「東坡雪堂」隊到醉完又醒，醒完又醉
我地成日都會有相似嘅人生經驗：
同朋友歡飲散宴，獨自走返屋企嘅寂寞
「彷彿」係東坡醉到連時間都唔清楚
好似我地後生出去玩，玩到唔知時間啦
屋企人都訓哂，「家童鼻息已雷鳴」
咁又無門匙，屋內嘅人聽唔到敲門聲
「敲門」不應，無人應門，意興闌珊
東坡借此機會，「倚杖聽江聲」，去望吓江海
我地可以睇睇東坡點形容臨皋亭景色：
臨皋亭下十數步，便是大江，其半是峨眉雪水。吾飲食沐浴皆取焉，何必歸鄉哉？江水風月本無常主，閒者便是主人。
景不孤生，因情而出
呢一連串嘅經驗描述，引出詞人心中苦悶
苦悶促成「倚杖聽江聲」，以解心結
長恨此身非我有，何時忘卻營營。夜闌風靜縠紋平，小舟從此逝，江海寄餘生。
下半片由景入心，力寫心理之變化，見其超曠之傾向
東坡聽住江潮起伏之聲，懷著醉意騷悶之心，生出「長恨此身非我有」
表層黎講，講緊東坡不准擅離黃州區域，形同軟禁
深層黎講，呢句出自莊子典故
《莊子‧知北遊》：「汝身非汝有也」
道家主張身體唔係人擁有嘅，好似我地控制唔到生老病死
身體變化係被決定，違反人類喜惡嘅自由意志，稱為自然命限
「知其不可奈何而安之若命」，身體只係暫時嘅寄託
「天地者，萬物之逆旅」，人生如賓也
「何時忘卻營營」，都係由《莊子‧庚桑楚》而來：
「全表形，抱汝生，無使汝思慮營營」
上言自然命限，此言文化命限
即人係社會必得遵守諸種規則，古代有科舉考試，現代有Dse
呢種規則，成為大多數人嘅唯一出路
對東坡黎講，除年紀老邁，都有係仕途不堪
身為罪臣受到軟禁，無法請辭嘅無奈痛苦
中國士人之矛盾，常係進退之間掙扎
土志於道，逍遙自在往往係對立
「夜闌風靜縠紋平，小舟從此逝，江海寄餘生。」
由上半片聽江聲，到下半片風止水平
東坡以景觸興，醒醉之間
係到幻想憧憬自己就此遠離俗世，乘舟歸去
「逝」係退隱
係放棄儒家式士志於道嘅理想
追求逍遙自在嘅夢想
然而夢想之所謂夢想，往往係違反客觀現實
東坡既係罪臣之身，又邊到可以「江海寄餘生」呢？
此中的矛盾衝突，化為沈鬱頓挫之筆
東坡就好似好想達到更高嘅精神境界，但又受困於現實
結句看似超曠，但始終未能導向解脫
甚至令人讀之更感受到佢嘅無奈
東坡係黃州三年啦，已經漸漸尋覓人生出路
同年，已經寫出有名嘅〈定風波〉、〈赤壁賦〉等作
呢首詞可見東坡意欲超脫嘅心
我地必須了解人生係動態嘅過程
有時超脫，有時超脫唔到，唔係固定嘅
但至少有此呢個超脫嘅企圖，先能生出超曠之作
No comments:
Post a Comment