[古典文學入門（四）前言]驀然回首，那人卻在，燈火闌珊處——詞中之龍辛稼軒

「辛稼軒，詞中之龍也！」
——陳廷焯《白雨齋詞話》


辛稼軒系列連載於LihkG

各位巴絲打好，又係我黎同大家吹吓水  
之前我已經講過三個文學家
魏晉陶淵明嘅《桃花源記》
晚唐李商隱嘅「此情可待追憶，只是當時已惘然」
北宋蘇東坡嘅赤壁三部曲
讀後不禁為古典文學嘅美而傾心  

由詩入詞，講完東坡，緊係要講稼軒詞
宋詞豪放派中以「蘇辛」並列齊名 
東坡於詞具開拓意義，但一生兼擅詩文詞三者
東坡中年始專注填詞，留下三百多首傳世
稼軒文學才能係哂詞到，詩文傳世極少
辛詞之美，蓋過詩文，共六百多首流傳至今 
同為豪放派，「蘇辛」兩人好鬼唔同
文學對讀比較，先可以分辨到細微嘅差異


如果要講中國勇武派嘅詞人 
絕非辛稼軒莫屬，真係識打仗嘅將軍黎
隨時好打過岳飛呀！
北宋尚叫安逸，南宋嘅辛，已經見證國士淪陷
好似97前嘅香港人，同97後嘅香港人咁 
兩者嘅差距好大，感受已經好唔同啦

辛稼軒曾經做過義軍反金
但係南宋做官，主戰絕不求和
因此被人投閒置散近二十年 
一生有三位老婆，生唔少仔女
英雄人物，都仲有好多兒女私情 
人生種種際遇嘅感觸，發而為詞
「蘇辛」之外，同李清照並稱「濟南二安」
我地會慢慢細講稼軒詞，感受辛嘅一生


唔知大家對詞中之龍嘅理解有幾多呢？
或者大多都係止於教科書嘅一首詞
〈青玉案． 東風夜放花千樹〉：東風夜放花千樹，更吹落、星如雨
只係睇呢首詞，都知「豪放」二字係概括唔到佢啦
咁稼軒詞嘅「豪放」係邊？ 
呢一方面同東坡詞有咩分別，點解可以並列？
稼軒詞有冇其他風格，其他形容？
稼軒咁多首詞，點解得呢一首入教科書？
以上種種疑問，我將會慢慢解答  

辛稼軒係中國歷代好罕見嘅文學家
讀佢嘅詞作，會感受到英雄氣概
即係一個真正嘅軍人，同你講佢嘅心事咁
希望透過稼軒詞，比大家睇見古典文學另一面
唔止怡情養性，唔止陰柔和諧
最後，希望唔會悶親大家啦