講者若瞳
秋の夜や旅の男の針仕事
秋夜啊，行旅男人的針線活
讀俳句嘅樂趣，在於佢嘅形式夠短
我地可以想像俳人生活偶有所感，出口成句
不過因為呢種隨意，有時往往令人難以理解
如果讀得明，讀者可以睇見俳人嘅生活感受
剪裁或者零碎，卻更接近生活本身嘅模樣
呢首俳句嘅作者係一茶
一茶三十歲時開始係各處流浪
呢句正係佢三十一歲嘅作品
流浪在外已有一段日子
做針線活，補吓衫咁，蘊釀出心底嘅感受
單從字面看，俳句好易理解：
秋の夜や旅の男の針仕事
秋夜啊，行旅男人的針線活
一茶係秋天旅行，晚上縫補衣衫
但讀俳句，要深入文字嘅深層細味
針線功夫大多都係女仔做架啦
但成日流浪嘅一茶又邊有老婆呢？
日本古時，一茶三十一歲應該成家立室
但係有趣嘅係，一茶係俳句冇表達不快
更多嘅係對生活細節忽然察覺，察覺自己與眾不同：
其他男人在家，佢係旅行
其他男人有老婆幫手縫衫，佢得自己對手
或者，佢亦可能有淡淡嘅慨嘆
畢竟秋夜係特別嘅時間，萬物開始蕭條
但又同時係歡慶收割嘅時候
秋季晚上風清氣爽，萬里無雲
但透出清冷嘅寒意，令感官更加敏銳
句子入面冇太多資訊，或者不必將這種心情說白
心理感受，一時之嘆，本來就係複雜嘅
一茶嘅「旅」同一般人嘅「旅」唔同
佢十四歲時已因為與繼母不和，離家到江戶搵食
係果個時候開始，佢早已經係一個旅人、流浪者
三十歲時再踏上流浪之途，對佢黎講唔係一般嘅離鄉別井
雙重嘅旅、雙重嘅流離
秋の夜や旅の男の針仕事
秋夜啊，行旅男人的針線活
三十一歲嘅一茶，正值壯年
而又走入人生之壯遊，十幾年無家可歸
只係得自己孤身面對開闊嘅天地
一切嘅感受，其實都蘊藏係一句「秋夜啊」之內
No comments:
Post a Comment