梵谷成世人都講到七七八八啦，但淨低未講嘅先係最重要
我地一路以黎睇住梵谷學左咁多野，從佢讀書畫礦工農民，再去巴黎學習印象派點描派浮世繪，到最近搬入亞爾，終於講到晚期啦
我地前面一齊睇左咁多集，同梵谷經歷左咁多
都可以話係為左呢個時期而準備
點解話最重要？
因為基本上我地大眾對梵谷嘅認識都係黎自晚期嘅作品
雖然晚期只係從一八八八年二月到一八九零年七月，但晚期我地都會細分三個
向日葵，咖啡座，羅納河上的星夜等作品出自亞爾時期
星夜，鳶尾花，有絲柏的道路等作品出自聖雷米時期
嘉舍醫師的畫像，麥田群鴉，奧維爾教堂等作品出自奧維時期
雖然只有短短一年半嘅光景，但因為梵谷到左呢段時期嘅技巧已經臻於圓熟
所以創作嘅質同量都非常高，單單係亞爾時期就創作左二百幾幅風景油畫、一百幾幅水彩同素描
今次我地就睇幾幅亞爾時期比較重要嘅作品
上次講到梵谷初到亞爾，吸受天地靈氣，深有感受再次模倣佢偶像米勒嘅畫作
完全睇到佢嘅個人風格出哂黎，開始從自己嘅風格中成長
余光中形容梵谷初到亞爾嘅狀態「南方嘅大太陽燒艷了他的色板，燒活了他的線條，燃着了已成死灰的早年的宗教狂熱」
另外講到梵谷對亞爾呢個地方瘋狂嘅愛同佢無比嘅寂寞形成無限嘅拉鋸
呢條吊橋就係令梵谷孤獨寂寞嘅引線之一
呢條係亞爾吊橋，正名叫朗格羅橋 (Le Pont Langlois)
已經毀於戰火，係1962年重建，但位置已經並非原址，而且改名為梵谷吊橋
當時梵谷初到亞爾，見到呢條橋令佢憶起家鄉荷蘭，所以畫左一系列嘅吊橋畫作
不過佢唔單單畫條吊橋，佢畫埋過緊橋嘅馬車，係河邊洗緊衫嘅婦人，撐傘過橋嘅人，畫低畫中人嘅生活先能夠解開梵谷嘅思鄉之情
呢一系列吊橋嘅風景畫都畫出碧藍嘅天空同河水，橙黃嘅草地同吊橋
兩者色調鮮明對比強烈，令人感覺更富感情同暖意
一系列畫作整體都帶出一片寧靜，配色同畫中人物嘅日常生活更滲透出一種平淡嘅家鄉味，加上我地睇過亞爾吊橋嘅實景圖有一個比較係到，就更加感受到當下梵谷內心嘅感情
除左思鄉之情帶黎嘅痛苦之外
梵谷仲蘊藏住大量嘅負能量
特別係身為一個異鄉游子所帶黎嘅寂寞
係梵谷初到亞爾時畫嘅麥田同亞爾橋系列，可以從畫中感受到有莫大嘅愛
不過隨住時間推移，佢心靈上嘅空洞無止境咁擴大，不安同寂寞慢慢掩沒左佢對亞爾嘅愛
梵谷只好不斷咁寫長篇大幅嘅信比所有人，以解寂寞之情
但始終唔係面對面交流，而且畫信一來一回非常耗時
所以唯一方法就係不斷畫畫去抒發感情，用全部精力放係繪畫到
當時嘅佢全日就只有畫畫食野瞓覺，梵谷講過有時佢會連畫十六個小時，又會連睡十二小時
總之當時嘅佢係好極端，特別係有躁鬱症，令佢嘅精神狀態好差
但就係呢種狀態之下佢畫出數幅佳作，亦都係今次我地重點要睇畫
分別係
《黃色房屋》（The Yellow House），1888年
《夜晚露天咖啡座》（Cafe Terrace at Night），1888年
《羅納河上的星夜》（Starry Night Over the Rhone），1888年
三幅作品都係一八八八年九月畫，各自用風景都帶出不同味道嘅寂寞
先從黃色房屋講起
The Yellow House, 1888, Van Gogh
一八八八年五月，梵谷租左間新屋
唔好睇呢間黃黚黚嘅屋平平無奇，佢背後嘅理念可以話係非常遠大
其實梵谷一直以黎都好想要個家
係信上面畫嘅黃屋
佢以前講過「我多麼願意安居下來並有一個家啊！實實在在，這是最好的工作環境，一旦安居下來以後，我們就應該一生一世都呆在那裡。」
所以當梵谷搬黎呢間黃屋嘅時候，佢真係好開心，佢覺得呢到就係佢安居嘅地方，係佢大展拳腳嘅地方
所以佢興致勃勃咁想去組織一個畫家社團，計劃要令呢間屋成為藝術家殿堂，可以吸引到好多畫家黎做交流嘅藝術聖殿
有個咁理想化嘅大計之後當然想分享喜悅比親朋戚友
佢當時仲力邀高更南下黎做駐場藝術家
當高更係六月回信答應佢嘅邀請時，梵谷興奮到一個極點
仲畫左好多畫去迎接高更嘅到來，當中就包括「向日葵」系列
可見梵谷對呢一切抱住幾大嘅期望，簡直推佢到一個至高嘅喜悅
不過你要諗下從一開始初到亞爾嘅狂喜，到呢次新屋新計劃又再次推到一個新嘅喜悅，每次梵谷好快又回歸到寂寞悲傷當中
特別係有躁鬱症嘅佢，大喜大悲令佢好痛苦
.jpg)
黃屋嘅水彩版本
係咁嘅背景資料下，呢幅畫就會有更多嘅意味
呢幅畫梵谷凝視住自己嘅住所，期待緊夢想嘅來臨
表面上係夢想嘅指向，係未來，梵谷想用佢黎填滿內心嘅空洞
但事實係顯露左梵谷內心寂寞嘅一面，特別係成幅畫嘅氣氛同構圖
成幅畫用黃色做主調，天空純粹用藍色
畫中心間屋就係梵谷嘅新住所
有綠色嘅門同窗，牆身係成幅畫最光亮嘅黃
梵谷放佢係畫嘅正中心，再加上間屋係梵谷計劃嘅重點
理應間屋係主角
不過比起間屋，周圍嘅氛圍更令人在意
跟本無辦法專注係主角身上而忽視周遭嘅環境
前景空無一人，房屋左右人群疏落，後景天空一樣，空空如也
成幅畫除左畫中心嘅房群之外，周圍都好荒蕪，顯得好寂寞
所以先會令人覺得顯露左梵谷內心寂寞嘅一面
最後你可以見到遠景橋上仲有火車向住黃屋方向駛過，可以理解成係畫高更嘅到來
雖然仲係好遠
No comments:
Post a Comment