魏晉名士之所以能予人強烈鮮明的印象，實由於其無所不在的一股自由精神，此一精神當即為其樞紐特質。……魏晉名士正是主張：當人們自覺到生命的存在時，便有權做自我的主宰，使自己的生命，得到最真切的實在。
——李清筠《魏晉名士人格研究》
——李清筠《魏晉名士人格研究》
稼軒 西江月(示兒曹以家事付之)
萬事雲煙忽過，百年蒲柳先衰。而今何事最相宜？宜醉宜游宜睡。
早趁催科了納，更量出入收支。乃翁依舊管些兒，管竹管山管水。
稼軒人生最後晚年係隱居至死嘅
係瓢泉嘅日子，佢對出仕為官嘅心都相對淡薄
好多時都係做一陣，或調任或罷官
係佢六十五歲，因「謬舉」之名降職
即係話佢向朝野推薦錯誤嘅人才
稼軒心灰意冷，決定炒老細正式辭官
到六十八歲死前，都一直拒絕出仕
稼軒晚年出仕之挫敗
當然係有非常悲壯嘅一面
而且寫出好多極具代表性嘅名作
但係比較少人注意嘅係
正因理想價值之不可能之崩潰
反而令到稼軒晚年較能釋放自己嘅生命
一切都無可挽回，唯有如此吧！
如果我地用呢個角度去睇
從水調歌頭(盟鷗)開始嘅講解至今
其實可以當做稼軒藉由失敗而自我解脫嘅過程
由此，我地唔會只係得出矛盾掙扎嘅負面
而係真切了解到稼軒隱居嘅日子
稼軒嘗試學陶淵明，轉化陶之面向嘅努力
並唔係一句懷才不遇，唔係一句白費功夫可以概括
稼軒之人生努力，以致人生之自我抉擇
確令佢有唔一樣嘅人生境界
稼軒 西江月(示兒曹以家事付之)
萬事雲煙忽過，百年蒲柳先衰。而今何事最相宜？宜醉宜游宜睡。
蒲柳：蒲、柳於秋天先落葉，喻年老
詞題：示兒曹以家事付之
呢首詞無史實記載創作年份
但從題目話詞人將家事託付比兒子
可見兒子長大成人，獨當一面
加埋詞作內容，應是瓢泉晚年隱居時作
上半片講自己老到唔想管事啦
我地讀呢首詞，不妨諗埋稼軒嘅對象
即係老豆對自己仔女講嘢嘅語氣
係寫得非常恰如其分嘅
「萬事雲煙忽過，百年蒲柳先衰」
詞人好淡泊咁講：
阿仔，你都知老豆以前幾威架啦
不過而家老啦，過去嘅成敗得失
萬事都好似天上嘅雲煙眨吓眼嘅過咗
好似我鍾愛嘅大自然咁
蒲柳入秋，先行落葉
我嘅百年人生都到年邁衰退嘅時候啦！
「而今何事最相宜？宜醉宜游宜睡」
家事，以至人世間一切俗事
一把年紀，我都唔想再管啦！
咁要做咩好呢？
當然係飲酒、遊山玩水，享受人生
仲有最緊要嘅，安心咁訓到自然醒
早趁催科了納，更量出入收支。乃翁依舊管些兒，管竹管山管水。
催科：官府催缴租稅
下半片係稼軒交代屋企嘅大事
你地記得快手交租稅呀
仲要好好計住我地頭家嘅收支
千祈唔好做敗家仔
咁我做老豆就唔管呢種事架啦
我管返平時鍾意做嘅事
遊山玩水，栽花種竹
總之閒事我管，煩事你地理
老子什麼事都不管啦！
成首詞寫得好輕鬆，好坦蕩
「管」之一字，仍見稼軒英雄之本色
同時間又充滿對兒子嘅幽默
一切嘅生命重責，彷彿都消失不見
稼軒老年嘅生活，又幾有錢
的確有部份係咁悠閒自得
相對好多中國文人，已經好幸福
No comments:
Post a Comment