辛棄疾既生為人就擺脫不了七情六欲，生活中自然有不同於「豪放」的一面，他的豪氣沖天卻也能兒女情長。在抑鬱不得志的官場生涯中，雖然心態上隨時做好北伐的打算，但在閒暇之餘情緒的抒解仍不能免俗的也選擇了美人懷抱，英雄愛美人是很自然的事。今人的目光在審視稼軒詞時，為符合辛棄疾的豪放生命情調，往往習於帶著道德的打量，這在品評古人作品時無端就多了沈重的包袱。
——梁淑芳
上次讀稼軒嘅一問：——梁淑芳
倩何人、喚取紅巾翠袖， 搵英雄淚？
中今中外，英雄落難時
總係需要有美女相伴，有愛情滋潤
對於稼軒呢種真男人
我地必須正視稼軒嘅身心需要
情慾、愛情，上連家國
都係稼軒人生困境嘅出路
稼軒呢種英雄人物
緊係好受女性歡迎，佢都來者不拒
係佢六十五歲做官果陣，仲比人彈劾好色
一生有三位老婆，七位妾侍
仲要長期蓄妓，日日換女玩
難怪有九子二女咁多啦！
稼軒嘅愛情故事記載唔多
亦都無東坡咁浪漫，留下唔同嘅悼亡詞
咁樣都唔代表稼軒唔重視愛情
係少數嘅記載，可以睇得出稼軒婚姻美滿
稼軒 浣溪沙(壽內子)
壽酒同斟喜有餘，朱顏卻對白髭鬚。兩人百歲恰乘除。
婚嫁剩添兒女拜，平安頻拆外家書。年年堂上壽星圖。
稼軒有三位老婆
原配趙氏，再娶范氏，三娶林氏
趙林兩位嘅正式記載真係少之又少
唯有范氏係成日比人提起
「朱顏卻對白髭鬚。兩人百歲恰乘除」
稼軒同范氏同歲，五十大壽一齊賀祝
稼軒呢位大文學家緊係要寫首詞送比佢啦
詞意淺白，睇得出佢地關係好好
稼軒 滿庭芳(靜夜思)
雲母屏開，珍珠簾閉，防風吹散沉香。離情抑鬱，金縷織硫黃。柏影桂枝交映，從容起，弄水銀堂。驚過半夏，涼透薄荷裳。
一鉤藤上月，尋常山夜，夢宿沙場。早已輕粉黛，獨活空房，欲續斷弦未得。烏頭白，最苦參商，當歸也！茱萸熟，地老菊花黃。
係稼軒同老婆有關嘅詞，呢首最特別
我地係無法判定呢首詞係咪稼軒手筆
正式嘅詞集並無收編
但呢首詞嘅故事流傳甚廣，係民間傳說
稼軒同原配趙氏係北方成親
話說稼軒起義抗金
佢係軍營入面，都難免掛念老婆
於是寫呢首詞寄比趙氏
全詞最特別嘅係以藥名入詞
雲母、珍珠、防風、沉香、郁金、硫黃、柏葉
桂枝、蓯蓉、水銀、半夏、薄荷、鉤藤、常山
宿沙、輕粉、獨活、續斷、烏頭、苦參、當歸
茱萸、熟地、菊花
但我地即使唔知呢二十四種中藥名
都可以讀通全詞，真係好神奇呀！
「雲母屏開，珍珠簾閉，防風吹散沉香。離情抑鬱，金縷織硫黃」
上半片稼軒想像老婆獨守空房嘅苦況
屏風開，珠簾閉
既係防風吹，又係壓抑嘅意象
日織夜織，都係為比遠方嘅老公
一針又一針嘅思念
「柏影桂枝交映，從容起，弄水銀堂。驚過半夏，涼透薄荷裳」
起身，經弄堂
時間一轉，竟半個夏天過去
濃縮無數日子嘅時間，以重複嘅動作呈現
又有因思念不知時日飛逝之意味
「一鉤藤上月，尋常山夜，夢宿沙場」
下半片更係想像之極致
寫稼軒沙場，又寫趙氏嘅夢
兩者似乎一時之間重疊相思
幾時先可以唔需要再「獨活」
可以一續兩人嘅恩愛呢？
「烏頭白，最苦參商，當歸也！茱萸熟，地老菊花黃」
以烏頭形容稼軒征戰沙場嘅白髮
參星與商星分隔，意指兩人無法相見
當歸即係應該要返去見老婆
茱萸、菊花嘅老黃枯萎
營造悲傷淒涼之意境
檳榔一去，已曆半夏，豈不當歸也。誰使君子，寄奴纏繞他枝，令故園芍藥花無主矣。妻叩視天南星，下視忍冬藤，盼來了白芨書，茹不盡黃連苦。
豆蔻不消心中恨，丁香空結雨中愁。人生三七過，看風吹西河柳，盼將軍益母。
最令人玩味嘅係
呢個傳說係有埋趙氏嘅回信
而且竟然一樣都係借用好多中藥名
細數之下，一共有十六種
檳榔借喻稼軒
半個夏天都過左，仲唔當歸？
你點解令「令故園芍藥花無主矣」
令我要獨守空房呢？
「丁香空結雨中愁」
出自李璟詞作：
青鳥不傳云外信，丁香空結雨中愁。
無法相會，愁緒一如丁香嘅花蕾結成無數
人生三七過，看風吹西河柳，盼將軍益母
三七，二十一
女人嘅青春點可以白白浪費
詩經：
中谷有蓷，暵其干矣。有女仳離，慨其嘆矣。
蓷，即益母草
詩經典故比喻作被拋棄嘅女子
即係話，仲唔返黎陪我？
民間傳說，可信不可信？
嚴格黎講，呢首詞已經無法斷定作者
亦好有可能後人偽托其詞
但係呢個故事，民間一直口耳相傳
影響到世人如何理解辛稼軒
唔止因為愛情浪漫
古人先將呢首詞話係稼軒所作
真同假，係文學接受史並唔重要
重要嘅係，世人點樣睇辛稼軒
呢個故事流傳至今
主因係貼合稼軒係世人眼中嘅形象
家國、愛情
無可否認，係構成稼軒兩大重要元素
係稼軒詞作嘅一大主題
No comments:
Post a Comment