講者若瞳
たんだすめ、住めば都ぞ、けふの月。
唯澄所留，所留即京城，今日之月。
呢句係俳聖松尾芭蕉二十三歲嘅作品
有注本話當時芭蕉睇住中秋嘅月亮澄澈（月係秋季語）
或者正因咁，俳人先會有住處嘅聯想
因為第一句「すめ」同第二句「住めば」同音
而後者又同第二句嘅日本俗語「住めば都」有關連
以諧音字表示兩個意思嘅連接（稱掛詞）
仲有使用諺語
有注本指兩者都係貞門派俳句嘅特點，令語調輕快
呢到有一種語言上嘅趣味
好似廣東話嘅諧音笑話咁
而「すめ」唔單止有掛詞嘅功用
放係兩句之間，更有一種節奏嘅連續
幾有中文修辭技巧頂真嘅效果
たんだすめ、住めば都ぞ、けふの月。
唯澄所留，所留即京城，今日之月。
「住めば都ぞ」直接可以理解「住下就是京城」
而其中嘅「都」則應理解為「可安居之處」
讀者應該唔難想像
昔日京城係日本較為繁盛、安全嘅地方
「けふ」同「きょう」（漢字可作今日／京）有關
聽落可能令人聯想到「今日之月」
或者「京之月」
如果係後者嘅話
京同月就分別與前兩句多添一重連繫
呢句最值得玩味之處
就係首句「たんだすめ」，直譯係「只要澄明」
「たんだ」本應作「ただ」，有指與當時其他流行嘅歌詞有關
不過那些歌曲已不可考，聊備一說
澄明指嘅係咩？
如果想像芭蕉寫句嘅環境
固然可以指中秋明月
但同時亦可以指向佢自己嘅心境：
因為心境澄明
於是見月澄澈
住在何處皆可安居
甚有東坡「此心安處是吾鄉」嘅味道
讀住咁令人心靈清爽嘅俳句
我地好難想像芭蕉當年只係二十出頭嘅年輕人
好似佢咁嘅心境超越唔少人成世嘅感受
寫成句作，難怪佢有「俳聖」美譽
係日本又有俳聖殿供奉（就在伊賀上野城附近）
實在不妨一讀再讀呀！
No comments:
Post a Comment