德尼思化粵文港: [古典文學入門（四）ep.12]文學家與理學家，竟成莫逆之交讀辛稼軒游武夷作棹歌呈晦翁十首之七、九，感皇恩(讀莊子聞朱晦庵即世)

棄疾嘗同朱熹遊武夷山，賦《九曲櫂歌》，熹書「克己復禮」、「夙興夜寐」，題其二齋室。熹歿，偽學禁方嚴，門生故舊至無送葬者，棄疾為文往哭之曰：「所不朽者，垂萬世名。孰謂公死，凜凜猶生！」
——《宋史·辛棄疾傳》

係中國歷史，文學家同理學家成日不和

最顯著嘅例子，係蘇東坡同程伊川
東坡詩詞文畫皆精，才高八斗
程伊川講儒家思想，講求禮節
程覺得東坡玩弄筆墨
東坡覺得程呆板保守
就好似兩種性格不合嘅人相處
兩邊都無做錯事，只係睇唔順眼咁

辛稼軒同朱熹成為好朋友，真係有趣
朱熹係中國思想史佔有極重要地位嘅理學家
錢穆《朱子新學案》：
在中國歷史上，前古有孔子，近古有朱子，此兩人皆在中國學術思想史及中國文化史上，發出莫大聲光，留下莫大影響。瞻觀全史，恐無第三人可與倫比。
朱熹思想固有獨到見解
更重要係佢制定邊四本係「四書」
論語、孟子、中庸、大學
每位要考科舉嘅學生都要熟讀「四書」
直至今日大學中文系依然必修

追溯辛稼軒與朱熹相交
係稼軒做江西安撫使力救人民於旱災
提出「劫禾者斬，閉糶著配」
即係搶糧者死，囤積者必須以公價售出
結果比人彈劾：「用錢如泥沙，殺人如草芥」
罷官之後正式開始隱居生活

朱熹一直好支持稼軒嘅做法

知道稼軒比人罷官，仲同弟子講：
辛幼安是個人才，豈有使不得之理！
經綸事業，有股肱王室之心；遊戲文章，亦膾炙士林之口。
稼軒隱居十年，再做返官
朱熹贈言：
臨民以寬，待士以禮，馭吏以嚴
稼軒自此為官剛柔並重，恩威並施
朝野之人仲讚佢厚道：

比居外台，讞議從厚，閩人戶知之

朱熹大稼軒十年，係佢嘅知音
最重要緊係佢地都係主戰派
真係估唔到朱熹會講：

非戰無以復仇，非守無以制勝，是皆天理之自然。
係南宋主和派當道嘅政壇
佢地兩個真係同是天涯淪落人

游武夷作棹歌呈晦翁十首之七
巨石亭亭缺囓多，懸知千古也消磨。
人間正覓擎天柱，無奈風吹雨打何。

兩人曾經同游武夷，泛舟九曲
江山如畫，緊係詩興大發啦
朱熹連寫《九曲棹歌》十首
稼軒都不甘示弱
寫返游武夷作棹歌呈晦翁十首

稼軒眼中嘅朱熹，就好似「擎天柱」

家國嘅巨石已經好多缺口
但「擎天柱」都係好難抵受風吹雨打
一再反映，佢地係幾與世不容

游武夷作棹歌呈晦翁十首之九
山中有客帝王師，日日吟詩坐釣磯。
費盡煙霞供不足，幾時西伯載將歸？

帝王師不受重用
唯有日日「吟詩坐釣磯」
幾時先有周文王黎賞識姜子牙呢？
答案係無嘅……

朱熹死前死後，極是悲涼
熹歿，偽學禁方嚴，門生故舊至無送葬者，棄疾為文往哭之曰：「所不朽者，垂萬世名。孰謂公死，凜凜猶生！」
朱熹彈劾韓侂胄失敗，被罷免
韓侂胄當政，斥朱熹為「偽學」
同支持朱熹嘅人列作「偽學逆黨」

著作禁毀，有關係人等不准為官、參加科考
史稱「慶元黨禁」

朱熹七十一歲，「正坐整衣冠，就枕而逝」
門生故舊都唔敢去送葬

出名嘅人只係得辛稼軒送佢最後一程
哭叫：
你嘅名聲將會千古不衰
死亡並唔能夠阻擋你思想嘅偉大！

稼軒感皇恩(讀莊子聞朱晦庵即世)

案上數編書，非莊即老。會說忘言始知道；萬言千句，不自能忘堪笑。今朝梅雨霽，青天好。

一壑一丘，輕衫短帽。白髮多時故人少。子雲何在，應有玄經遺草。江河流日夜，何時了。

梅雨霽：朱熹之書霽

詞題：讀莊子聞朱晦庵即世
即係讀緊莊子果陣
突然聽到好友朱熹逝世
即場要寫返首詞，抒發悲情

上半片先寫讀莊老之感
書枱上幾本書，都係莊子、老子
要理解道家思想，要了解其意
就唔好執著於表面外在嘅語言

莊子曰：
蹄者所以在兔，得兔而忘蹄。言者所以在意，得意而忘言
既得其意，外在形式又何足掛齒

「萬言千句，不自能忘堪笑」
莊子嘅生死觀，係一氣化之
莊子妻死，惠子弔之，莊子則方箕距鼓盆而歌
個個都好奇怪莊子死老婆點解咁開心
莊子就答：
雜乎芒芴之間，變而有氣，氣變而有形，形變而有生，今又變而之死，是相與為春秋冬夏四時行也
人本身就係大自然萬物之一
一氣化之，然後氣散又回歸自然
好似四季變化咁，又有咩驚奇呢？

呢到稼軒係到講緊：
唉，可笑呀
我係到誦讀莊老之書
但聽到你嘅離去
哀傷依然都係不能自制

「今朝梅雨霽，青天好」
由老莊學說，回到朱熹嘅儒學
稼軒嘅生命情懷，始終係著重家國政治
暗示對朱熹提出理學嘅歌頌
儒家嘅用世之思，先係最適合佢