李白、杜甫一定係熱門必讀
相對黎講李商隱嘅作品無咁易入口
雖然其文學成就極高，但大眾對佢認識好少
閱讀有時應該要有「難度」
因為困難，代表我地跳出自己熟稔嘅視野
亦都意味我地透過閱讀
開拓緊一個陌生而豐富嘅世界
今日我地讀李商隱嘅錦瑟
係不論何時何地，只要講起李商隱
都一定會提及嘅詩，公認係集其文學大成之作
最特別嘅地方係，李商隱晚年自編《玉溪生詩集》
將錦瑟一詩，放做第一首嘅「開卷」之作
可以話係代表詩人嘅一生，遠比其他詩作重要
正因為咁，李商隱錦瑟嘅閱讀
必須對佢嘅詩作大體有基礎嘅理解
愈讀得多佢嘅文句，愈能品味錦瑟美妙動人嘅地方
以下從我地之前咁多篇嘅閱讀，區分以下三個切入角度：
1.李商隱嘅人生不幸及沈淪下僚之飄泊
流鶯、賈生、暮秋獨遊曲江、野菊、宿晉昌亭聞驚禽、春雨
2.李商隱嘅歷史意識及其典故之運用
常娥、賈生、籌筆驛、青陵臺、無題(來是空言去絕蹤)、銀河吹笙
3.李商隱嘅愛情悲劇及其欲求超脫情困之掙扎
無題(鳳尾香羅薄幾重)、無題(重幃深下莫愁堂)、無題(相見難時別亦難)、
無題(昨夜星辰昨夜風)、無題(來是空言去絕蹤)、銀河吹笙
錦瑟無端五十弦，一弦一柱思華年。
錦瑟：花紋好靚嘅樂器
弦：弦線
柱：樂器嘅音柱
華年：美好嘅歲月
1.李商隱嘅人生不幸及沈淪下僚之飄泊
「錦瑟」係極美嘅樂器
李商隱由呢樣物件中思考、追憶自己嘅一生
人生是否有如音樂？
曲終係咪必定人散？
「無端」意指突然，不可預測
瑟本來只係得二十五條弦線
但線「無端」斷開了，變成「五十弦」
曲終人散，人生只有一次奏樂的演出
悵臥新春白袷衣，白門寥落意多違。
失羣掛木知何限，遠隔天涯共此心。
細路獨來當此夕，清尊相伴省他年。
人生走到尾聲，到最後或者得返回憶
「一弦一柱」，都係可以令人想到過去嘅歲月
因為過去，因為變成回憶
就算係再悲慘嘅現實，都透出一種時光嘅美
就算係無法預測嘅「無端」結束
依然都係淒美嘅「華年」
莊生曉夢：莊子夢見自己成為蝴蝶，醒返係到諗，到底而家係我夢見自己係蝴蝶，定係蝴蝶先係我，夢見自己做緊莊子？
《莊子·齊物論》：「莊周夢為蝴蝶，栩栩然蝴蝶也。自喻適志歟，不知周也。偶然覺，則蘧蘧然周也。不知周之夢為蝴蝶歟？蝴蝶之夢為周歟？」
望帝：古代蜀王，死左之後變成杜鵑，其聲悲苦
2.李商隱嘅歷史意識及其典故之運用
又或者，與其話人生似曲
不如話人生似夢，真真假假又點樣分得清呢？
莊子呢位哲人都尚且「迷蝴蝶」
詩人又係咪迷商隱而不自知？
往事如夢，人生如夢，似乎一切都握唔緊
現實世界嘅成敗得失，係咪都係一樣呢？
可憐夜半虛前席，不問蒼生問鬼神！
管樂有才真不忝，關張無命欲何如？
「望帝」死後依然留戀人間
將佢嘅「春心」，熱烈嘅生命之火
化為杜鵑，生命係可以傳遞，可以生生不息
李商隱死去千年，但如今我地仲係到讀緊佢嘅詩作
詩人「托」詩歌之美，文學之永恆
仍然係歷史長河中講述自己嘅淒美情思
甚至化為詩文化中嘅歷史典範
滄海月明珠有淚：傳說南海有人魚，流嘅眼淚會化成珍珠
藍田：著名產玉嘅地方，傳說玉伏於地，陽光猛烈果陣會係地下冒煙
3.李商隱嘅愛情悲劇及其欲求超脫情困之掙扎
人生嘅痛苦，人生嘅喜樂
已成過去，曾經流過嘅眼淚化成珍珠
每一粒嘅珍珠，都映照一個動人嘅故事
曾經流過嘅眼淚，所有發生嘅悲劇，都有佢嘅意義
春蠶到死絲方盡，蠟炬成灰淚始乾。
來是空言去絕蹤，月斜樓上五更鐘。
直道相思了無益，未妨惆悵是清狂。
當時，其實唔會知道呢種意義架
只係覺得人生係一個悲劇，好似愛情咁令人絕望
但所有發生嘅故事，都會深藏成為地下嘅玉
只要等時機黎到，陽光溫暖嘅日子來臨
煙嵐似水，迷離間化成人生最美嘅風景
文學最高之境界：至情無文
當人類嘅感情去到極致，極其嚴肅面對自己最重要嘅情感
所能做嘅，就係用最簡單嘅字眼濃縮成最具分量嘅句子
往往都唔係咩華麗，多加修飾嘅詞彙
此一名句，流傳千古
樸素有力，動人心緒
此處有兩個解讀：
「可待」字，有豈待或等待之義
1.豈待(直述句)
呢種迷霧般嘅情感，唔止係今日先開始追憶
係當下發生果陣，已經令人感到惘然
此情可待成追憶？只是當時已惘然。
2.等待(疑問句)
呢種迷霧般嘅情感，係咪只能等待佢變成回憶，無法改變？
的確係咁，因為過去已成過去
曾經只是曾經
身在局中，惘然不知可以點樣做得更好
不論上面邊種解法都好
最重要係表達左李商隱對人生種種嘅「追憶」
而呢一種「追憶」，正正係因為當下嘅「惘然」
詩人追憶往事之惘然，惘然於往事之記憶
呢一首詩，亦都係全部嘅詩
李商隱呢一句嘅人生經驗，何嘗唔係我地嘅人生經驗？
錦瑟無端五十弦，一弦一柱思華年。
莊生曉夢迷蝴蝶，望帝春心托杜鵑。
滄海月明珠有淚，藍田日暖玉生煙。
此情可待成追憶，只是當時已惘然。
李商隱嘅錦瑟，係詩人最出名嘅作品
千百年來，係無數人口中誦讀過，係無數人心中憶記過
仕途不順，愛情失意，求仙失敗，種種人生嘅悲哀
李商隱不可改變嘅「惘然」，成就詩歌極為傑出嘅作品
一即是全，全即是一
錦瑟所包含李商隱嘅整全，不愧為詩集之首
詩歌所呈現李商隱嘅個體經驗，同時係我地嘅普遍感受
錦瑟之作，盡見李商隱文學之大成
No comments:
Post a Comment