正所謂一代有一代之文學
中國古典文學最出名嘅，一定係唐詩
唐代係詩歌嘅高峰，高於其他時期
我地以前學過嘅咩絕詩律詩
屬於近體詩，係果陣係好新潮嘅嘢
都係唐代先開始成熟、完整
簡單黎講：
古體詩＞近體詩＞新詩
正因為唐代咁重要
所以文學史特登係唐代入面再分左四期黎講
即係所謂四唐說啦，略舉入面勁出名嘅人：
1.初唐（陳子昂）
2.盛唐（李白、杜甫）
3.中唐（白居易、韓愈）
4.晚唐（李商隱）
如果出生時地係有分難度嘅話
相信李商隱係㨂咗地獄級
有咩慘得過見到昔日嘅輝煌
但自己就生活係一切都要終結嘅時代？
睇到呢到，大家係咪好有共嗚呢
《唐詩別裁集‧李商隱小傳》載曰：
李商隱，字義山，河內人。開成中進士，觀弘農尉。會昌中，王茂元鎮河陽，辟為掌書記，得侍御史。茂元以子妻之。李德裕秉政，厚遇之。李宗閩黨與德裕為仇，卒不遇......大中末，仲郢左遷，商隱罷，未幾卒。
下面我會劃分幾個重點：
1.童年嘅悲劇
李商隱老豆叫李嗣，做過縣官
但係佢十歲左右就死咗啦
佢可以話係一個沒落嘅中產階級
好彩佢有個阿叔叫李房
細細個就開始教佢寫古文
叫做有機會試吓用知識改變命運
（呢個先係佢慘情真樣黎）
2.沈淪下僚，成世仔無咩出色
佢考左兩次科舉，兩次都Fail左
26歲仔考第三次呀，佢先考得上進士
進士只算係低空飛過，佢一開始分咗去做文書官仔
後來因為佢受黨爭影響
成世仔都係做人地嘅幕僚，做吓文書咁
功就上頭攞，嘢比哂你做
呢種情況係咪又係好鬼熟呢
古代稱之為「沈淪下僚」
3.時代嘅崩壞，牛李黨爭
既然係地獄級難度
咁呢個末世緊係好多亂況啦
中央權力失衡，藩鎮之亂，好多地方都自把自為
國君又無咩用，奸臣當道，就有所謂嘅牛李黨爭啦
點解李商隱呢個小人物又關事呢？
咁佢其實好無辜嘅
講返佢細個，老豆死左
就有個人叫令狐楚嘅人救左佢，請佢做吓嘢
又教埋佢寫駢文（即係唐代公文）
所以令狐楚係佢恩人黎
令狐呢派，係被劃分為「牛黨」
咁又點啫，都可以有著數架
好可惜，李商隱個老婆係「李黨」王茂元嘅女
結果就兩邊都唔係人，個個當你係鬼呀
成世仔都因為咁而不得志
死前都無真正一展抱負，揚眉吐氣過呀陰公
以上悲劇嘅人生，好深遠咁影響左佢嘅詩歌文章
No comments:
Post a Comment