[古典文學入門（六）Ep.20]趙明誠之死，李清照終生之悲 悲讀李清照好事近(風定落花深)

江東轉運副使直徵猷閣李謨胡知之，馳告守臣祕閣修撰趙明誠，時明誠已被命移知湖州，弗聽。謨飭兵將所部團民兵伏塗巷中，柵其隘。夜半，天慶觀火，諸軍誤而出，亦至，不得入，遂斧南門而去。遲明，訪明誠，則與通判毋丘絳、觀察推官湯允恭縋城宵遁矣。
——《建炎以來系年要錄》

趙明誠一生最受人批評嘅事

唔係佢出去玩女，冷落李清照

亦都唔係佢偏安南方，建制保守

最不恥嘅事，正係佢人生最後嘅「縋城宵遁」

縋，即「以繩有所縣也」

深宵時分用繩索吊自己出城離開

身為當地地方官嘅佢點解要咁做呢？

咁就要講返前因啦！

趙明誠當時正係準備調職之際，但又未正式離任

佢突然收到風，竟然有人準備謀反

身為一介文人，手無縛雞之力，緊係好驚驚啦

加埋佢兩位手下又怕死，叫埋佢一齊走佬

呢個決定，令佢身敗名裂

一，結果佢係公事被人罷免

二，當時李清照仲係城內

趙明誠自己走佬，完全無理老婆

在公在私，呢件事都係錯到離哂大譜！

李清照〈夏日絕句〉：

生當做人傑，死亦為鬼雄。

至今思項羽，不肯過江東。

無耐之後，李趙二人經過烏江

李清照寫下一首對英雄期待嘅詩

暗含對當時主和派嘅不滿

有人話，趙明誠讀呢首一定好慚愧

因為好明顯佢並唔係「英雄」

趙明誠嘅死黎得非常突然

話說佢又收到詔命，有得做返官

照道理，佢要先去朝見皇上感恩

咁佢之前做錯事，就好驚啦

「貴公子」嘅佢「冒大暑」趕路

結果趙生中暑，死埋……

自此，李清照失去咗自己最愛嘅人

亦都象徵咗佢嘅人生再唔圓滿

好事近

風定落花深，簾外擁紅堆雪。長記海棠開後，正傷春時節。

酒闌歌罷玉尊空，青缸暗明滅。魂夢不堪幽怨，更一聲啼鴂。

丈夫死後，李清照追悼之作不絕

除咗係心靈嘅嚴重打擊

成為寡婦係社會相當弱勢

無咗老公，無哂身心嘅依靠

呢種情況之下，李清照成日都病

我地閱讀文學必須記得

文學創作絕對唔係唯心嘅事

最直接嘅影響往往係自己身體嘅狀態

而對於李清照黎講

病唔止係影響到佢嘅作品

亦都令佢走向重婚嘅錯誤決定

我地之後會再講

風定落花深，簾外擁紅堆雪。長記海棠開後，正傷春時節。

上半片寫景，又有追憶

詞人佇立，雙眸投向簾外之雪景

一陣寒風吹拂，直至平靜

風本無形，又何以觀之？

只因遍地皆見落花

白中見紅，更是讓人無法忽視

試問捲簾人，卻道海棠依舊。知否？知否？應是綠肥紅瘦。

長記，即為追憶

李清照仍然記得雙十年華時

海棠花開後，經風吹雨打嘅「傷春時節」

雖然落花之景相似

但我地卻知，一切都唔同啦

少女嘅傷春，係因為身在美好

而又怕呢種咁青春嘅時日一逝不回

但此刻詞人中年嘅傷春

卻係生離死別之後，青春早已不在

「長記」二字，即含有今昔對比之悲

酒闌歌罷玉尊空，青缸暗明滅。魂夢不堪幽怨，更一聲啼鴂。

下半片即景抒情，景不孤生，因情而出

酒宴之後，詞人獨處空閣

青缸，即油燈

代指青色嘅燈罩

「暗明滅」既係實景

其實又隱含詞人心境之悲哀

醉眼斜眺那忽明忽暗嘅燈火

一切都係不能確定，一切都係無法捉住

最後竟然「滅」，連半點希望都無埋！

「魂夢不堪幽怨，更一聲啼鴂」

真正嘅椎心之痛，即使逃逸到夢境

靈魂仍然「不堪幽怨」，無從回避

甚至因「啼鴂」而驚醒，又得面對現實

「啼鴂」，即杜鵑

特徵係呢種鳥係暮春先叫

連接上半片之「傷春」，彼此呼應

由夢而驚醒，世界告訴李清照

你最美好嘅時光，人生美好嘅可能

已經不再存在，只餘下無數傷悲追憶罷了