[古典文學入門（四）ep.33]辛詞第一？西風殘照，稼軒老矣 研讀辛稼軒永遇樂(京口北固亭懷古)

辛詞當以京口北固亭懷古《永遇樂》為第一。
——明．楊慎《詞品》

稼軒 永遇樂(京口北固亭懷古)

千古江山，英雄無覓，孫仲謀處。舞榭歌臺，風流總被，雨打風吹去。斜陽草樹，尋常巷陌，人道寄奴曾住。想當年，金戈鐵馬，氣吞萬里如虎。

元嘉草草，封狼居胥，贏得倉皇北顧。四十三年，望中猶記，烽火揚州路。可堪回首，佛狸祠下，一片神鴉社鼓。憑誰問：廉頗老矣，尚能飯否？

讀過稼軒三十一首詞，終於黎到最後一首 
有唔少學者，都認為呢首係辛詞入面寫得最好嘅作品
文學評價，都係要睇返每個人唔同嘅文學觀
最緊要係經過對讀、比較，再有一理由支撐自己
咁樣先係負責任嘅讀者，先會有進步 

劉克莊《辛稼軒集序》：
世之知公者，誦其詩詞，而以前輩謂有井水處皆倡柳詞。余謂耆卿且留連光景，歌頌太平爾；公所作大聲鞋酪，小聲鏗鈞，橫絕六合，掃空萬古，自有蒼生以來所無。其穗纖綿密者，亦不在小晏、秦郎之下。

稼軒詞中，真係不乏絕妙好詞 
講愛情，有「驀然回首，那人卻在，燈火闌珊處」
講友誼，有「道：男兒到死心如鐵。看試手，補天裂」
講自然，有「天上有行雲，人在行雲裏」
講理趣，有「欲說還休。卻道天涼好個秋」
中國文學嘅大詞人，又點止咁少值得一提
真係數之不盡，每一首都足以再三細味 

但係聰明嘅讀者一定會問：點解？ 
點解會有人覺得呢首係辛詞第一？
點解我會將呢首作為收尾最後一講？
因為呢首即使唔係辛詞寫得最好嘅作品
都仍然係最具代表性，最能呈現稼軒一生志向
稼軒一生念念不忘嘅執念 
唔係愛情、友誼，唔係田園、哲理……
由出世嘅一刻，已經同家國緊緊咁連繫一齊



稼軒 永遇樂(京口北固亭懷古)

千古江山，英雄無覓，孫仲謀處。舞榭歌臺，風流總被，雨打風吹去。斜陽草樹，尋常巷陌，人道寄奴曾住。想當年，金戈鐵馬，氣吞萬里如虎。

劉裕：南朝劉宋開國皇帝
舞榭歌臺：榭，平臺上嘅房子。即演出歌舞嘅場所

詞題「懷古」二字
即係話呢一首係懷古詞
懷古乃指由文物古蹟引發
懷想昔日嘅人與事

此詞同南鄉子(登京口北固亭有懷)一樣作於寧宗開禧元年
係呢一年稼軒因「謬舉」之罪降職
之後又被臣僚論列「好色貪財，淫刑聚斂」，怒而辭官
發生種種事情前，稼軒仲係守緊鎮江
已經六十六歲啦，呢首詞係佢死前兩年嘅感懷 

上半片借物起興，所借者係「北固亭」
從地方又引出兩位古人，孫權、劉裕
孫權係設立京口鎮之人，劉裕曾經住過京口鎮
兩位都係留名青史嘅英雄豪傑

不恨古人吾不見，恨古人、不見吾狂耳

「千古江山，英雄無覓，孫仲謀處」
江山千古長存，但英雄卻都逝去
景存人亡，孫權建立京口鎮
但係而家佢又係邊到呢？
昔年繁華，昔日歌舞，昔時風流人物
其實都係經唔起時代嘅風雨！



千古興亡，百年悲笑，一時登覽

更能消幾番風雨，匆匆春又歸去

「舞榭歌臺，風流總被，雨打風吹去」
再多嘅歌舞，再多嘅英雄人物
種種風流韻事，又何曾逃得過時間？
時間係「雨打」，係「風吹」
抽象化為具體，孫權已逝 

「斜陽草樹，尋常巷陌，人道寄奴曾住」
斜陽照亮種滿普通草樹嘅巷陌
呢到嘅尋常，係好普通無咩特別嘅巷陌
人地講係南朝宋武帝劉裕住過嘅地方
寄奴，係劉裕嘅小名 

醉裡挑燈看劍，夢回吹角連營

把吳鉤看了，欄干拍徧，無人會，登臨意
「想當年，金戈鐵馬，氣吞萬里如虎」
當年北方中原被少數民族佔領
劉裕係京口起事，北伐滅南燕、後秦
仲推翻東晉自立為帝，成為南朝劉宋開國皇帝 
如斯氣概，呢種布衣英雄
可以做到「氣吞萬里如虎」咁打敗外族
正係稼軒一夢再一夢，最想做到功業



元嘉草草，封狼居胥，贏得倉皇北顧。四十三年，望中猶記，烽火揚州路。可堪回首，佛狸祠下，一片神鴉社鼓。憑誰問：廉頗老矣，尚能飯否？

封狼居胥：封，即祭天，戰勝嘅慶典。狼居胥山，今內蒙古自治區西北部
下半片借古諷今，古今對照，又有自喻之悲
劉裕之子，南朝宋文帝劉義隆
聽信手下王玄謨北伐嘅意見，有意北伐立功
元嘉二十七年命王玄謨草率北伐，大敗
北魏軍隊追至長江邊
落得驚惶失措咁回首北望敵人嘅追兵 

稼軒呢邊係緊扣當下嘅時局 
同樣嘅事，都發生係宋朝
北方土地淪陷於異族金人，金人亦嘗試南侵
直至長江邊上，受挫於虞允文，改走揚州之道

追往事，嘆今吾，春風不染白髭鬚

獨倚危樓，不信人間別有愁

「四十三年，望中猶記，烽火揚州路」

稼軒少年，率義軍反抗金兵
當年決意效歸南朝，親見揚州一路烽火
一路都係無數義人志士力抗金人
登樓北望，即使四十三年後，仍然無法忘懷 
昔日嘅豪情，過去嘅戰事
終其一生，都係纏繞住稼軒

而家韓侘胄當權，貪功噪進
隨時會令「元嘉草草」嘅悲劇重現 
文學好多時係有預言嘅效果：
作此詞後一年，韓侘胄揮兵北伐，大敗而回

何處望神州！滿眼風光北固樓

「可堪回首，佛狸祠下，一片神鴉社鼓」

最諷刺嘅係，昔年「元嘉草草」之時
北方胡人國君北魏太武帝曾反擊南下
係瓜州留有祠堂，並未折除
而家只見一片祭神嘅鼓聲，滿地吃祭品嘅烏鴉 
已經無人再記得呢位外族入侵嘅事
呢邊緊係稼軒好有力咁諷刺南宋偏於安樂啦！ 



一點淒涼千古意，獨倚西風寥廓

獨立蒼茫醉不歸。日暮天寒，歸去來兮

了卻君王天下事，贏得生前身後名。可憐白髮生！

「憑誰問：廉頗老矣，尚能飯否？」

結束引出《史記‧廉頗藺相如列傳》之典
廉頗係戰國時趙國名將，晚年被罷官
秦兵屢次攻打趙國，趙王好驚
就想起用返廉頗，派使者去探察佢 
使者受咗廉頗仇人郭開嘅賄賂：
廉將軍雖老，尚善飯，然與臣坐，頃之三遺矢矣。
話廉頗老啦，雖然仲好大胃口
但係佢無耐要去三次大便
趙王以為廉頗真係老啦，沒再召用 

由歷史到家國，家國再至個人
呢種個人之苦，即係受小人陷害
千古以來，諸多士人嘅「士不遇」困局
稼軒、廉頗同受小人陷害 
六十六歲咁老，朝廷都唔會再重用佢啦
北伐夢想，一生英雄氣概，終究落空

上半片一頓一揚，盡言志向
下半片連引史事，令人洩氣
直到結句嘅自喻，更是衰颯無力
西風殘照，稼軒真係英雄老矣
事實亦係兩年後，呢位英雄年老病逝 



劉辰翁《辛稼軒詞序》：
詞至東坡，傾蕩磊落，如詩如文，如天地奇觀，豈與群兒雌聲較工拙。然猶未至用經用史，牽《雅頌》入鄭衛也。自辛稼軒前，用一語如此者必且掩口。及稼軒橫豎爛漫，乃如禪宗棒喝，頭頭皆是；又悲茄萬鼓，平生不平事并卮酒，但覺賓主酣暢，談不暇顧。詞至此亦足矣。

詞至稼軒，用經用史
無一不可，無一不妙
我地睇辛詞，要理解稼軒嘅歷史意識
掌屋典故，以及當時嘅對比
進而體悟稼軒嘅家國悲情
雖然家國悲情，對我地黎講好似好遠
但置之於香港之處境
稼軒之詞，又何嘗沒有共鳴呢？