[古典文學入門（五）ep.10]簡介基本古代思想概念：越名教而任自然 共讀《世說新語》之魏晉圍城內的竹林七賢：出走有何意義？

讀竹林七賢的故事，就能看見中國在千年漫長的文化中鮮少出現的孤獨者的表情，他們生命裏的孤獨表現在行為上，不一定著書立說，也不一定會做大官，他們以個人的孤獨標舉對群體墮落的對抗。我們現在聽不到阮籍和其他竹林七賢的嘯，可是《世說新語》裏說，當阮籍長嘯時，山鳴谷應，震驚了所有的人，那種發自肺腑、令人熱淚盈眶的吶喊，我相信是非常動人的。
——蔣勳《孤獨六講》

我地話咁快已經睇哂竹林七賢嘅人生故事 
我必須係到指出，竹林七賢嘅記載唔止咁少
特別係最出名嘅嵇康、阮籍兩位
佢地都係中國文學、思想史留名嘅一代人傑 
嵇康嘅哲理，阮籍嘅詩句，都係另一個重要話題

而我地今次主要係對竹林七賢呢個整體嘅共同特色
同埋佢地七位個別唔同嘅人生態度講解 
接近人物歷史傳記嘅講法，以求知人論世
其實名士係歷史人物嘅其中一種類型
仲有好多好多唔同類型，好似道士咁都值得我地留意
類型嘅存在，往往反映咗時代嘅特色
進一步去睇，類型人物係唔同時代都有相似
好似竹林七賢呢種人，今時今日嘅香港就無咩？ 


《世說新語‧棲逸》：
阮步兵嘯，聞數百步。蘇門山中，忽有真人，樵伐者咸共傳說。阮籍往觀，見其人擁膝巖側，籍登嶺就之，箕踞相對。籍商略終古，上陳黃、農玄寂之道，下考三代盛德之美以問之，仡然不應。復敘有為之教、棲神導氣之術以觀之，彼猶如前，凝矚不轉。籍因對之長嘯，良久，乃笑曰：「可更作。」籍復嘯，意盡，退。還半嶺許，聞上唒然有聲，如數部鼓吹，林谷傳響。顧看，迺向人嘯也。

中國傳統入面有種神奇野叫「嘯」
「嘯」唔係等同我地今時今日嘅大叫
而係比世界男高音仲勁嘅丹田之氣
「嘯」可以震驚群鳥，天地動搖 
往往係道家隱士，住係深山先有呢種功夫
聽聞而家都仲有人識，唔知大家信唔信呢？ 

阮籍都係出名識長嘯嘅人
有日聽聞有個高人係深山，就去見佢
阮籍同佢講咗好多學問，人生嘅見解
點知對方都唔撚理佢，阮籍呢刻要爆了！ 

阮籍長嘯，對方終於有反應啦
高人笑住講：再黎呀！ 
「籍復嘯，意盡，退」
阮籍心諗呢位高人都無料到嘅
點知落山落到中間果陣，突然聽到遠方巨聲
「如數部鼓吹，林谷傳響」
原來係高人長嘯，功力深厚過佢十倍！ 

阮籍長嘯嘅故仔，到底有咩意思呢？ 
首先，阮籍並唔係一個俗人，佢識長嘯
其次，阮籍始於離唔開俗世，佢只能去參見深山高人
再者，真正遠離俗世嘅高人，長嘯勁過阮籍好多
以上嘅重點，都係扣連返魏晉呢個時代 


《世說新語．任誕》：
陳留阮籍，譙國嵇康，河內山濤，三人年皆相比，康年少亞之。預此契者：沛國劉伶，陳留阮咸，河內向秀，琅邪王戎。七人常集于竹林之下，肆意酣暢，故世謂「竹林七賢。」

對竹林七賢黎講，魏晉係一座圍城 
阮籍、嵇康佢地都好想離開呢座圍城
亦都曾經出走於竹林之間，史上留名
但竹林始終只係廟堂同山水之間嘅中介
注定係暫時，而非長遠之策 

呢種共同出走，離開群眾嘅渴望
正係「越名教而任自然」
唔好再做僵化廟堂倫理嘅奴隸
回歸自然，走向山水
構成「恣情任性」嘅共相 

《世說新語．雅量》：
嵇中散臨刑東市，神氣不變。索琴彈之，奏廣陵散。曲終曰：「袁孝尼嘗請學此散，吾靳固不與，廣陵散於今絕矣！」太學生三千人上書，請以為師，不許。文王亦尋悔焉。

「越名教而任自然」出自嵇康嘅《釋私論》：
「夫君子者，心無措乎是非，而行不違乎道者也。夫氣靜神虛者，心不存乎矜尚；體亮心達者，情不繫於所欲。矜尚不存乎心，故能越名教而任自然；情不繫於所欲，故能審貴賤而通物情。」
君子要做到唔受外界嘅影響
尊從自己嘅本心，不受欲望控制
名利、是非、情欲都係社會賦予構成嘅事物
超越呢種控制，返回原初自然之心
咁樣先可以有逍遙自在嘅人生 



陳寅格《陶淵明之思想與清談之關係》：
「故名教者，依魏晉人解釋，以名為教，即以官長君臣之義為教，亦即入世求仕者所宜奉行者也。其主張與崇尚自然即避世不仕者適相違反，此兩者之不同，明白已甚。」
嵇康並非空泛而論，係針對魏晉名教
好明顯係講緊當時廟堂權力嘅黑暗
當在位者係賤人，充斥老屎忽
唔通年輕人仲要繼續做佢地隻狗咩？

「名教」，即係「名分教化」
指維護政權統治嘅「三紀六紀」等級名分
即係反對「禮教」嘅僵化、偽善 
當時嘅「名教」係誅殺異己、追名逐利嘅工具
「恣情任性」，即「任憑自己心性嘅自然情感」生活

但我地都知道……
嵇康到最後都係離唔開呢座圍城
反名教而出走，因名教而判刑
三千太學生，每一個都係年輕嘅良心 
曲終人散，意味竹林七賢幾位出走者嘅結局
「廣陵散於今絕矣！」
圍城，又何止只係魏晉時代？ 


《世說新語．傷逝篇》：
「吾昔與嵇叔夜、阮嗣宗共酣飲於此壚，竹林之遊，亦預其末。自嵇生夭、阮公亡以來，便為時所羈紲。今日視此雖近，邈若山河。」

好有趣嘅係，人係歷史動態不斷變化嘅動物
竹林七賢唔係個個都一心出走
當佢地知道出走唔可能，唯有委曲求全
好似向秀、阮咸咁，勉強求存
錢鍾書：
「避世陽狂，即屬機變，跡似任真，心實飾偽，甘遭誹笑，求免疑猜。」
亂世之中扮野，本來係正常嘅 

更加唔好講，仲有山濤、王戎咁
樂於做官，頗有成就，名利雙收
原來魏晉呢座圍城唔係個個都想出去
「城內的人想出來，城外的人想進去。」
名利、權力，都比抽象嘅自然更加吸引
想入去嘅人，或者比想出去嘅人多好多 

但係堅持係咪真係無價值？
至少歷史嘅評價，嵇康、阮籍受人敬佩
佢地留下嘅風度，自然任性嘅美學
比起其他留係圍城內嘅人都更加動人心弦 

亦都因為咁，俗物王戎多年後回首：
「視此雖近，邈若山河」
阮籍看高人，王戎憶嵇康、阮籍
都係對人格嘅敬仰，都係對美嘅追求
竹林七賢，即使為時所羈紲
但竹林之遊仍然長存
後世之人至今仍然念念不忘
只等一杯酒，一聲長嘯