[古典文學入門（六）Ep.13]簡介基本古典文學概念：文學批評 兼讀李清照〈詞論〉之人生最美好的金石年華

後屏居鄉里十年，仰取俯拾，衣食有餘。連守兩郡，竭其俸入，以事鉛槧。每獲一書，即同共勘校，整集簽題。得書畫、彝鼎，亦摩玩舒捲，指摘疵病，夜盡一燭為率。故能紙札精緻，字畫完整，冠諸收書家。余性偶強記，每飯罷，坐歸來堂烹茶，指堆積書史，言某事在某書某卷第幾頁第幾行，以中否角勝負，為飲茶先後。中即舉杯大笑，至茶傾覆懷中，反不得飲而起。甘心老是鄉矣，故雖處憂患困窮，而志不屈。
——李清照〈金石錄後序〉

話說趙挺之位高權重，做埋相國
但大約一年後罷免，五日之後仲死埋
既然係咁，佢嘅親友就被另一批當權者清洗
情況就好似我地嘅政治現況一樣
一失去權力，就會被人秋後算帳

咁呢件事，緊係連累埋佢個仔趙明誠啦
成個家族都唯有返鄉下隱居
大難臨頭，先會患難見真情
李清照唔單止無怨言，仲好支持老公

係青州，李清照將書房命名為「歸來堂」
又幫自己改咗個號，叫做「易安」
所以我地會見到有人叫李清照為「易安居士」
古人改名，緊係有典故啦：
歸去來兮，田園將蕪胡不歸？既自以心為形役，奚惆悵而獨悲？
倚南窗以寄傲，審容膝之易安。園日涉以成趣，門雖設而常關。

如果話中國文人兩大靈魂
一定係屈原、陶淵明，一仕一隱
即使女性嘅李清照，都受到影響
用陶淵明嘅〈歸去來辭〉改名



後屏居鄉里十年，仰取俯拾，衣食有餘。……甘心老是鄉矣，故雖處憂患困窮，而志不屈。
係呢十年，李清照過得好開心
佢同趙明誠都好鍾意睇書，研究金石
得閒又寫吓詩，吟風弄月
雖然呢段時期嘅作品幾近都散失哂

李清照十五年後，趙明誠已經過世
寫過一首回憶呢段期間嘅詩
〈偶成〉
十五年前花月底，相從曾賦賞花時。
今看花月渾相似，安得情懷似昔時。
不斷嘅追憶，係李清照中後期作品嘅特色
因為自此之後，佢幾乎都無咩開心日子



樂府聲詩並著，最盛於唐。開元、天寶間，有李八郎者，能歌擅天下。時新及第進士開宴曲江，榜中一名士先召李，使易服隱名姓，衣冠故敝，精神慘沮，與同之宴所。曰：「表弟願與坐末。」眾皆不顧。既酒行樂作，歌者進，時曹元謙、念奴為冠，歌罷，眾皆咨嗟稱賞。名士忽指李曰：「請表弟歌。」眾皆哂，或有怒者。及轉喉發聲，歌一曲，眾皆泣下，羅拜，曰：「此必李八郎也。」

李清照呢段時期，留落黎又好重要嘅係呢篇詞論
呢篇詞論嘅性質係屬於「文學批評」
咁當然呢個字唔係當時嘅詞語，係我地今日先會咁講
即係話，以「文學」為對象嘅評論

今時今日，我地見到有人就「文學作品」寫文
好似導讀、評論、賞析，以至系統化嘅「文學理論」
古典文學會有詩話、詞話、曲詞咁嘅形式
都可以稱之為廣義嘅「文學批評」
出色嘅「文學批評」，係可以影響到文學創作嘅生態

詞論開首，點解要講呢位李八郎歌手嘅故仔呢？
正係要指出詞作音樂性嘅重要
大家聽完佢唱，「及轉喉發聲，歌一曲，眾皆泣下」
已經暗含詞唔單止係文字，更有音樂性質



逮至本朝，禮樂文武大備，又涵養百餘年，始有柳屯田永者，變舊聲作新聲，出『樂章集』，大得聲稱於世。雖協音律，而詞語塵下。又有張子野、宋子京兄弟、沈唐、元絳、晁次膺輩繼出，雖時時有妙語，而破碎何足名家。至晏元獻、陽、蘇子瞻，學際天人，作為小歌詞，直如酌蠡水於大海，然皆句讀不葺之詩爾，又往往不協音律者。
李清照列數宋朝第一流嘅詞人
柳永、歐陽修、蘇東坡……
每個都點出佢嘅優點，亦都批評佢嘅缺失
好似話東坡好有才學，但又批評佢唔識音律
而符合音律嘅，文句又未必夠好



王介甫、曾子固，文章似西漢，若作一小歌詞，則人必絕倒，不可讀也。乃知別是一家，知之者少。後晏叔原、賀方回、秦少游、黃魯直出，始能知之。又晏苦無鋪敘；賀苦少典重；秦則專主情致，而少故實，譬如貧家美女，雖極妍麗豐逸，而終乏富貴態；黃即尚故實，而多疵病，譬如良玉有瑕，價自減半矣。

李清照提出詞係「別是一家」嘅文學批評
即係講緊，詞唔同詩，唔同散文
係有詞自己嘅本色，有詞本身嘅音樂
只係講理論唔夠，一定要舉例

點解呢？因為只講理論係空虛嘅
只係屬於「應然」，應該如此
但「文學作品」係「實然」，實際存在
所以任何講文學理論嘅人，都要舉返實際例子
「晏叔原、賀方回、秦少游、黃魯直」
晏幾道、賀鑄、秦觀、黃庭堅
雖然李清照都有批評佢地不足
但佢地至少「始能知之」，都係正面嘅

咁當然，李清照嘅詞作係最好嘅印證
後人講「易安體」，係模仿佢嘅詞
就算係辛棄疾呢位英雄人物，都有學過李清照
「用淺俗之語，發清新之思」
「皆以尋常語度入音律。練句精則巧，平淡入調者難」
大體係「易安體」特色，不妨之後細心品味