[古典文學入門（六）Ep.16]易安名詞：充滿誤解的尋尋覓覓？ 研讀李清照聲聲慢

且《秋詞·聲聲慢》：「尋尋覓覓，冷冷清清，凄凄慘慘戚戚。」此乃公孫大娘舞劍手，本朝非無能詞之士，未曾有一下十四疊字者，用《文選》諸賦格。後疊又雲「梧桐更兼細雨，到黃昏點點滴滴」，又使疊字，俱無斧鑿痕。更有一奇字云：「守着窗兒，獨自怎生得黑？」黑字不許第二人押。婦人有此文筆，殆間氣也。
——宋．張端義

https://www.youtube.com/watch?v=Vr3YMoFGPr8

聲聲慢

尋尋覓覓，冷冷清清，悽悽慘慘戚戚。乍暖還寒時候，最難將息。三杯兩盞淡酒，怎敵他、曉來風急。雁過也，正傷心，卻是舊時相識。

滿地黃花堆積，憔悴損，如今有誰堪摘。守著窗兒，獨自怎生得黑。梧桐更兼細雨，到黃昏、點點滴滴。這次第，怎一個愁字了得。

今日要講李清照最出名嘅詞作 
但係，呢首詞作亦係近年有唔同嘅解讀
係進入詞作之前，要先講此詞嘅創作時期
舊時大家認為呢首詞係寫於李清照晚年
判斷係趙明誠死後嘅悲苦之作 




但係隨住現代學者如陳祖美嘅研究
我地都知道，李清照係老公未死之前已經受到冷落
加埋其他詞作嘅間接證據支持
即係話聲聲慢寫於受老公冷落嘅時期
暫時此一新說，係比較有說服力嘅 

話雖如此，古典文學係好難有定論
除非史實證明，但往往係無嘅 
所以我地睇作品時，可以暫時相信比較好嘅詮釋
但千其唔好覺得係定論，因為沒有最好只有更好
無論邊種講法，都改變唔到呢首詞嘅主題
李清照非常深刻咁表達咗自己嘅悲苦之情 



尋尋覓覓，冷冷清清，悽悽慘慘戚戚。乍暖還寒時候，最難將息。三杯兩盞淡酒，怎敵他、曉來風急。雁過也，正傷心，卻是舊時相識。

清照起手之奇，千古至今讚賞之人不絕
除咗張端義講：
此乃公孫大娘舞劍手，本朝非無能詞之士，未曾有一下十四疊字者。
明代吳承恩亦話：
易安此詞首起十四疊字，超然筆墨蹊徑之外。
清代周濟：
雙聲疊韻字，要著意布置，有宜雙不宜疊、宜壘不宜雙處；重字則既雙且壘，尤宜斟酌，如李易安之『悽悽慘慘戚戚』，三壘韻，六雙聲，是鍛煉出來，非偶然拈得也。

雙聲，即聲母相同之字
疊韻，即韻母相同之字
大量使用重複嘅字眼，係全詞特色 
「尋尋覓覓，冷冷清清，悽悽慘慘戚戚」
詞人全然掛空著筆，無一實景，全憑想像

可以係漆黑冷清嘅房間，悽涼咁尋覓出路
可以係不斷係自己嘅內心尋覓，只感冷清慘戚
反覆誦讀，係詩詞嘅「聲音意象」 
透過聲音嘅來回往返，除文字外，別有歧義



好有趣嘅係，有另一種睇法
清代陳廷焯：
十四疊字，不過造語隽耳，詞境深淺，殊不在此。執是以論詞，不免魔障。
意思大概係話，呢種手法既非李清照首創
除咗少見，都係遊戲文字，呢首詞最正根本唔係呢到！
技法之外，篇章內容先係更加重要 

「乍暖還寒時候，最難將息」
李清照好精準咁掌握咗貼近日常生活嘅比喻
乍暖還寒，一早一晚溫差好大嘅時候
我地最難好好休息，最容易生病
詞人敏銳確切感知到一切都唔對勁嘅狀態
而呢種情況，我地每個人都曾經試過 

「三杯兩盞淡酒，怎敵他曉來風急」
如果大家中學有好好讀過
呢首詞一定會問：
係咪打錯字，點解係「曉」唔係「晚」？ 

以前讀嘅係舊版本，近人比較支持新版本
梁啟超：
這詞是寫從早到晚一天的實感，那種梵獨晒惶的景況，非本人不能領略。所以一字一淚，都是咬著牙根咽下。
俞平伯：
「曉來」，各本多作「晚來」，殆因下文「黃昏」云云。其實詞寫一整天，非一晚的事，若云「晚來風急」，則反而重複。上文「三杯兩盞淡酒」是早酒，即《念奴嬌》詞所謂「扶頭酒醒」；下文「雁過也」，即彼詞「征鴻過盡」。今從《草堂詩餘別集》、《詞綜》、張氏《詞選》等各本，作「曉來」。

呢種講法，唔止更貼近全詞脈絡
即係「乍暖還寒」，建基於一早一晚
而且更加拓展咗全詞嘅時間流動 
由清早到黃昏，黃昏再至晚上孤苦嘅等待
此乃「晚」此一字比唔上「曉」嘅原因

「雁過也，正傷心，卻是舊時相識」
雲中誰寄錦書來？雁字回時，月滿西樓。
清照傷心時看見飛雁，勾起昔日回憶
過去嘅雁，昔日嘅人，都會返黎搵我
但係如今，雁在人卻不再回來…… 



滿地黃花堆積，憔悴損，如今有誰堪摘。守著窗兒，獨自怎生得黑。梧桐更兼細雨，到黃昏、點點滴滴。這次第，怎一個愁字了得。

損：極
怎生：怎麼
次弟：景況

深秋殘花，堆積滿地
恰如詞人之心境，雖生尤死 
青春美好嘅年月早已過去
而家仲會有人願意理我咩？
此問之怨，直指趙明誠嘅冷漠 

守窗之姿態，隱含等待
李清照孤守空房，望向窗外
好怕好怕只得一個人面對黑夜來臨
曾經嘅歡愉，先令人擋唔住寂寞
呢種等待，會唔會係往後無數景況？
係一片黑潮中掩沒咗生命嘅美好 

「梧桐更兼細雨，到黃昏、點點滴滴」
溫庭筠〈更漏子〉：
梧桐樹，三更雨，不道離情正苦。一葉葉，一聲聲，空階滴到明。
李清照化用溫詞句子，係「聲音意象」有更好嘅表現
吳熊和：
二十多個字裡舌、齒兩聲交加重壘，看來是特意用嚙嚙叮嚀的口吻，來表達憂郁惝恍的心情，這些都是經過慘淡經營的，卻絕無雕琢的痕跡，同時用心細膩而筆致奇橫，使人一能不贊歎其藝術手腕之高明。

點點滴滴，打在清照心頭
由早上等到黃昏，無雨至有雨 
乍暖之後，正是還寒之時
陰冷濕重的天氣，豈非最難將息？
呢種最難將息，又何止係外景呢？

「這次第，怎一個愁字了得」
辛棄疾詞曰：
而今識盡愁滋味，欲說還休。欲說還休。卻道天涼好個秋。
如何分辨文學之高低？
常人說愁，只會講我好唔開心呀！
但其實感情係好難言傳，好鬼複雜 
正因如此，好嘅文學係可以用唔同嘅語言
傳遞呢種感性嘅內容，直達人心，有所共感

詞人將內心之「愁」，化作詞句
以最貼身嘅日常經驗，用最精緻嘅淺俗用語
愁情不絕，點點滴滴，直到黑潮捲至 
「尋尋覓覓，冷冷清清，悽悽慘慘戚戚」
生命之大悲哀，莫過於全世界只剩下自己一個