[古典文學入門（六）Ep.4]閨閣脂粉之外，別有豪情逸興 共讀李清照怨王孫(湖上風來波浩渺)

易安倜儻，有丈夫氣，乃閨閣中之蘇、辛，非秦、柳也。
——清代沈曾植《菌閣瑣談》

怨王孫

湖上風來波浩渺。秋已暮、紅稀香少。水光山色與人親，說不盡、無窮好。

蓮子已成荷葉老。青露洗、萍花汀草。眠沙鷗鷺不回頭，似也恨、人歸早。

傷春之後，我地黎睇悲秋之作 
李清照相比傳統女性嘅生活相對開放
除咗少女惜春之情，亦有記遊嘅詞
大體而言，文學家嘅題材愈廣
所能呈現嘅文學作品風格，也會更多元 

記遊之作，多數見於男性作家
呢點相信大家都估到，同生活經驗有關
男人係要出去見識世面，遊山玩水 
咁女人，就要留係屋企照顧家庭
因此，我地好少見到女性嘅記遊之作

李清照嘅家庭，李清照嘅自主
令佢比較多機會有得出去玩 
佢有咁嘅生活經驗，先寫得出咁嘅作品
呢種當時幾乎只有男人先寫嘅題材
所以咪有人話佢有「有丈夫氣」
父權咁話，做到好似男人咁好勁架啦！ 



湖上風來波浩渺。秋已暮、紅稀香少。水光山色與人親，說不盡、無窮好。

少女秋天遊湖，風掠波起
滿目花殘，再無撲鼻而黎嘅香氣
但呢邊特別嘅係，詞人並無順景而悲
而係一反常態，好有遊興 

李清照話：「水光山色與人親」
景隨心造，主觀嘅心可以改變外在嘅景
眼前景物之悲樂，全在一心嘅態度 
我地可以想像，少女難得出遊
玩得好開心，好盡情，先會話：
秋天嘅美景真係千言萬語都講唔盡啊！ 

閱讀古典詩詞，記住八個字：
景不孤生，因情而出 
唔好以為作品寫景，就真係單純係景
文學家係萬千景物，選取一景一物
無論有意無意，我地都可以諗諗背後嘅意義 



蓮子已成荷葉老。青露洗、萍花汀草。眠沙鷗鷺不回頭，似也恨、人歸早。

蓮子已經長成，荷葉老去
空間反映時間嘅流逝，更加具體
露水沾粘係水邊花草，下連詞人嘅離去
因為要返去啦，先會貼近返岸邊景物 

「眠沙」二字，形容「鷗鷺」
即係話佢地訓哂係沙灘到休息嘅姿勢
「不回頭」之見，正因清照不捨回頭
如果唔係詞人又點知佢地無望佢？ 

最後先會好豪邁咁講：
「似也恨、人歸早」
主觀嘅心，係中國直觀式嘅代入 
莊子曰：「鯈魚出遊從容，是魚之樂也。」惠子曰：「子非魚，安知魚之樂？」莊子曰：「子非我，安知我不知魚之樂？」
合理與否，並唔係最重要嘅關鍵
直觀，講求係個人直接對大千世界嘅觀照
即係以情入情，文學家嘅心遠大於客觀事實 

「鷗鷺」唔轉頭，係因為佢地恨
恨我呢位美少女，咁快就要離開佢地！
呢種對秋景嘅不捨，豪邁嘅「悲秋」 
一反傷春悲秋嘅文人常態
的確唔係當時女性可以寫得出嘅句子
係早期嘅清照詞作，已經隱含佢嘅與別不同