[古典文學入門（六）Ep.1]罕見的例外，李清照人生的三個階段

自少年便有詩名，才力華贍，逼近前輩，在士大夫中已不多得，若本朝婦人，當推詞釆第一。
——宋代王灼《碧雞漫志》

沒有任何人可以活係歷史、社會之外
外在嘅時代條件，內在嘅才情性格
兩者係一個互動、辯證嘅動態過程入面
成就我們每一個人嘅存在 

李清照咁出名，生平研究當然唔少
舊說將李清照分為兩個階段 
但隨學界研究愈多，發現李清照更豐富嘅面向
所以提出婚前、婚後至南渡、南渡之後
每個唔同嘅人生階段，都有唔同嘅創作內容 
我地不妨先了解佢大概嘅人生經歷


一、婚前：知書識禮嘅女性教育

世道既降，教典非古，男子之志四方，猶可隆師親友以為善；女子生長環堵之中，能著美行垂於汗青，豈易得哉。

如果用女性主義嘅講法
中國古代係明顯嘅父權社會，重男輕女 
好多女仔，根本無機會有好嘅發展
正因如此，往往係男人留名青史
女人只係男人嘅物化附屬物咋！ 

相對好多人，李清照好好彩
父親李格非，為蘇門「後四學士」之一
即係蘇東坡好欣賞嘅後輩，有得做吓官咁
知識水平高，李清照有好好嘅家庭教育
令佢天生嘅才學，可以有所發揮 

呢個時期，少女情懷總是詩 
李清照已經開始寫出唔少好詞
更值得關注嘅係，佢受到父親影響好大
因為父親而關注朝野政治
更寫下詩句表達自己嘅政治睇法
李清照除咗愛情，佢對現實嘅關注都好多 


二、婚後至南渡：家族、家庭的維繫

除咗愛情，家庭係更大嘅概念
李格非同東坡一齊被列為「元祐奸黨」 
而趙明誠老豆趙挺之，反而係新黨嘅重要官員
李清照曾經夾係兩者之間，好難做人

不過宋代嘅黨爭起伏好大
後黎連趙挺之都罷官病死咗
李趙二人住係山東幾十年，好幸福
寫詩詞、治金石、著《詞論》 
我地係引子已經點出咗
李清照、趙明誠愛情未必真係咁完滿
之後嘅故仔，大體已經係引子講過

呢到必須一提，李清照受時代影響
雖然好有主見、才學，但仍以家庭為最高價值
婚後即以趙明誠為生活重心 
已經由少女嘅個人世界，轉入現實家庭嘅生活


三、南渡之後：介入現實的自主

趙明誠死後，李清照得返自己一個 
同時，佢又身懷好多貴重嘅文物
唔少人當時都想謀取佢亡夫留低嘅寶貝
終於防不勝防，比人偷咗其中五箱
好多好多文物都散失哂啦 

李清照單身女子，無助傷心咁病咗
當時有位叫張汝舟嘅男人
用言語欺騙李清照，同佢結婚 
但係李清照已經無咩財物
張汝舟對佢拳打腳踢，想佢交出黎 

好彩李清照好醒目
知道佢係靠謊報舉數取得官職
於是就去告發自己老公
成功靠女性自主嘅力量解決苦難 
因為呢件事，李清照自己都坐咗九日監
當時告自己親人都係有罪架！
好彩李清照有親人做官救咗佢咋
可想而知，佢要離開呢個男人嘅決心好大 

李清照的壽限考察，在她年屆甚至年逾古稀時，仍有某種行跡線索可尋，而從現存作品來看，在她六十歲前後彷彿已經擱筆。可以斷言的是，李清照的過早擱筆，絕不是因為「江郎才盡」，相反，在其晚年，不但「神明未衰落」，而且依然精神健旺，欲以其學傳授後人。她的擱筆，如同其謝絕「香車寶馬」達官貴人的召邀，甘願躲到「簾兒底下聽人笑語」，也就是用孤獨和沉默來表示對現實的不滿和抵觸，亦可見其「涅而不緇」的品格！她最終是抱着如同宗澤大呼「過河者三」的復國心願和傾聽着「傷心枕上三更雨」的「北人」思鄉情懷，約於七十三四歲時，在杭州離開人世。

除咗懷念趙明誠嘅詞作
李清照都好關注朝野之事
對主和派嘅人無咩好感 
加上懷念北方故土，以沈默抗議
李清照嘅一生，女性嘅自主
加埋寫出無數傑出嘅文學作品
真係可謂中國古伐一個罕見嘅例外！